Adbyŭsia sojm Partyi BNF i hramadzkaha abjadnańnia BNF “Adradžeńnie”. Jon byŭ pryśviečany pytańniam padrychtoŭki da źjezdu partyi, jaki adbudziecca 8 śniežnia. Na sojmie namieśnik staršyni partyi Viktar Ivaškievič zajaviŭ pra namier balatavacca na pasadu staršyni Partyi BNF. Taksama sojm uchvaliŭ šerah akcyj, prymierkavanych da Dziadoŭ.
U vystupie Viktar Ivaškievič abhruntavaŭ svaju pazycyju. Jon zajaviŭ:
“Dla pieratvareńnia Partyi BNF z maleńkaj partyi, adnoj ź nievialičkich partyjaŭ abjadnanych demsiłaŭ, u masavuju partyju, jakaja b była lideram ADS, front musić inicyjavać i ŭznačalić masavuju kampaniju. Takaja kampanija mnoju była abvieščana paśla praviadzieńnia akcyi “Eŭrapiejski marš” pad nazvaj “Kampanija “Eŭrapiejski marš”.
Spadar Ivaškievič padvioŭ vyniki Eŭrapiejskaha maršu. Jon zajaviŭ, što ŭdałosia mabilizavać dyplamatyčnuju padtrymku. Upieršyniu eŭrapiejskija dyplamaty pryniali niepasredny udzieł u kankretnaj akcyi apazycyi. Taksama jon adznačyŭ, što abjadnanyja demsiły vydzielili faktyčny nul u biudžet Eŭrapiejskaha maršu. Adnak, pavodle spadara Ivaškieviča, udałosia zajmieć padtrymku akcyi, chacia i deklaratyŭnuju, ad usich demsiłaŭ.
Viktar Ivaškievič vykłaŭ na sojmie prapanovy pa razhortvańni “Kampanii “Eŭrapiejski marš”. Jana budzie mieć niekalki nakirunkaŭ: “Za eŭrapiejskuju Biełaruś”, “Za svabodu palitviaźniaŭ”, “Za svabodnyja vybary” i “Za demakratyčnych deputataŭ”. Padčas kampanii prapanujecca pačać masavuju verboŭku valanteraŭ Eŭrapiejskaha maršu. A taksama kaardynavać dziejańni eŭrapiejskich strukturaŭ i ŭnutry krainy.
Spadar Ivaškievič prapanavaŭ skłaści śpis ź dźviuch tysiač čałaviek, jakija daduć zhodu ŭvajści u vybarkamy. I hety śpis davieści da zamiežnych dyplamataŭ, kab patrabavańnie ich uklučeńnia ŭ kamisii stała ŭmovaj ekanamičnych prajektaŭ Eŭropy i Biełarusi. Ahitacyjnaja kampanija musić vieścisia ŭ kankretnych vybarčych akruhach dziela realnaha atrymańnia bolšaj pałovy hałasoŭ. Taksama spadar Ivaškievič vykazaŭsia za praviadzieńnie masavaj akcyi 25 sakavika.
“Heta možna rabić, kali front heta budzie niepasredna ŭznačalvać. Kali staršynia frontu budzie iści napieradzie hetaha ruchu persanalna.
Ja baču svaju zadaču mabilizavać uvieś front na rašeńnie zadač, jakija pierad nami stajać. Z tym, kab usie, chto naležyć da roznych hrupovak, pracavali razam. Ja liču, što front nie pavinien być u cieniu inšych lideraŭ ADS za košt prajaŭleńnia svajoj inicyjatyvy. Ja liču, što kiraŭnik frontu nia moža być chłopčykam na pabiahuškach u dziadzieńki Milinkieviča. Ja liču, što kiraŭnik frontu moža być paŭnavartasnym, mocnym partneram, u tym liku i Milinkieviča, kali toj zachoča realna pracavać u zmahańni za niezaležnaść i demakratyju ŭ Biełarusi. Ale staršynia partyi musić być asobaj, jakaja prajaŭlaje inicyjatyvu, biare na siabie adkaznaść i vykonvaje ŭziatyja na siabie plany”.
Adnosna zajavy Viktara Ivaškieviča siabra sojmu Juraś Chadyka zajaviŭ:
“Adno tolki spadziavańnie, kab heta nie pryviało da raskołu frontu. Kab u vyniku pieramohi Ivaškieviča prychilniki Vincuka nie syšli z frontu ci naadvarot. Ja dumaju, što ŭsio adbudziecca narmalna i budzie praciahvacca narmalnaja praca”.
Staršynia Partyi BNF Vincuk Viačorka skazaŭ, što taksama budzie balatavacca. Jon prakamentavaŭ Radyjo Svaboda zajavu svajho namieśnika:
“Ja staŭlusia stanoŭča da ŭsich demakratyčnych inicyjatyvaŭ. Ja staŭlusia stanoŭča da alternatyŭnych vybaraŭ i chaču nahadać, što ŭ froncie na apošnich źjezdach, akramia pieradapošniaha, zaŭsiody była alternatyva i ja pieramahaŭ na alternatyŭnych vybarach. I što tyčycca asabista Viktara, to my ź im naležym da tych u BNF, chto abaraniaje frontaŭskija intaresy. My – frontaŭcy. I ŭ hetym sensie dyskusija, palemika pamiž frontaŭcami – tolki na karyść frontu”.
Taksama sojm uchvaliŭ šerah akcyj, prymierkavanych da Dziadoŭ i Dnia pamiaci. 27 kastryčnika ab 11 hadzinie ŭ Kurapatach ładzicca tałaka padčas jakoj čakajecca ŭznaŭleńnie pałamanaha vandałami Kryža “pakutnikam Biełarusi” . 27 kastryčnika projdzie tradycyjnaje ŭšanavańnie pamiaci bratoŭ Kalinoŭskich u Śvisłačy. 28 kastryčnika budzie padtrymana šeście u Kurapaty, jakoje ładzić KCHP. 29 kastryčnika planujecca sabracca va ŭročyščy Kurapaty i adtul naviedać memaryjalnyja miescy masavych rasstrełaŭ.
