Barysaŭski BATE za try tury da finišu daterminova staŭ čempijonam krainy pa futbole.
U hetuju niadzielu barysaŭski BATE ŭ čaćviorty raz u svajoj historyi staŭ čempijonam krainy pa futbole (1999, 2002, 2006, 2007). Pryčym, zrabili jany heta druhi raz zapar. Takoje ŭ našym pieršynstvie nie ŭdavałasia nivodnaj kamandzie ŭžo bolš za dziesiać hadoŭ.
Symbalična, što čarhovy čempijonski tytuł barysaŭcy aformili ŭ matčy ź mienskim MTZ-RIPA (0:0), jaki ŭznačalvaje były trener BATE Jury Puntus. Try hady tamu, kali Puntus sychodziŭ z BATE, to šmat chto sa specyjalistaŭ mierkavaŭ, što na hetym mohuć skončycca załatyja dziańki barysaŭskaha futbołu. Pieršy sezon pad kiraŭnictvam novaha nastaŭnika Ihara Kryvušenki tolki paćvierdziŭ takija sumnyja vysnovy. Kamanda, jakaja dahetul nikoli nie zastavałasia ŭ nacyjanalnym pieršynstvie biez medaloŭ, finišavała tolki piataj.
Pačatak minułaha sezonu taksama nie nadavaŭ fanam BATE aptymizmu. Pa papiarednich prahnozach barysaŭcy nie pavinny byli navat začapicca za medali. Vyjšła ž zusim inakš. Paśla ciažkaha startu BATE vydaŭ bliskučuju pieramožnuju seryju. Nie abyšłosia i biez šancavańnia, u apošnim tury mienskaje “Dynama” nie zmahło pierahulać adnaklubnikaŭ ź Bieraścia, tym samym pazbaviŭšy nieabchodnaści ŭ praviadzieńni załatoha matču, ale ž šancuje macniejšym.
Sioletni sezon prajšoŭ pry vializnaj pieravazie BATE nad sapiernikami. U čempijonstvie Kryvušenki i kampanii amal nichto nie sumniavaŭsia ŭžo paśla pieršaha kruhu. Pakul BATE atrymlivaŭ adnu pieramohu za druhoj, kankurentaŭ kidała ŭ roznyja baki. Niestabilnaść MTZ-RIPA, “Homielu”, “Šachciora” i dazvolili BATE ŭvieś čempijanat adčuvać siabie dosyć kamfortna, a pieršaje miesca zaniać za čatyry hulni da finišu.
Hetaja pieramoha barysaŭskaj kamandy dazvalaje havaryć mienavita pra fenomen BATE, a nia trenera Puntusa, u jakoha paśla sychodu ničoha nie atrymlivajecca.
Najpierš pośpiechi barysaŭcaŭ hruntujucca na dobraj pracy z moładździu, a taksama na impetnym hieneralnym dyrektary Anatolu Kapskim, jaki nie škaduje ni ŭłasnaha času, ni zdaroŭja na lubimuju kamandu. Barysaŭcy zaŭsiody rabili i robiać staŭku na miascovych futbalistaŭ, jakich viaduć u hałoŭnuju kamandu z samych rańnich hadoŭ. Skažam, jašče letaś nichto tołkam nia viedaŭ abaroncu Jahora Filipienku, a siońnia jon hulec asnovy zbornaj Biełarusi. Liderskija funkcyi sioleta taksama adčuli zusim jašče maładyja Kryviec, braty Dźmitry i Pavał Płatonavy, Radźkoŭ, Stasievič. Hulniu kamandy cementujuć niekalki daśviedčanych futbalistaŭ – Fiedarovič, Bliźniuk, Jermakovič, Lichtarovič. Nia lišnimi ŭ ansambli klubu taksama vyhladajuć i lehijanery z Rasiei – Kazancaŭ, Sacharaŭ, Chahuš. Apošniaha ŭvohule pačali vyklikać na hulni moładzievaj zbornaj Rasiei. U svaju čarhu Štanhie vyklikaje ŭ zbornuju našaj krainy Radźkova, Filipienku, Bliźniuka, Radzivonava, stasieviča.
Hety hod staŭ admietny dla BATE taksama vydatnym vystupam u eŭrakubkach. Barysaŭcy byli litaralna ŭ adnym kroku ad traplańnia ŭ hrupavy turnir Lihi čempijonaŭ. Tolki niedachopam vopytu možna patłumačyć nierealizavanyja momanty ŭ bucharesckim matčy sa “Ściaŭa”. Paśla BATE pryvioz u Biełaruś kamandu z elitnaha hišpanskaha dyvizijonu “Viljareał”. Zhulać ź im na roŭnych nie atrymałasia, ale sam fakt sapiernictva z takoj kamandaj havoryć sam za siabie.
Absalutna dakładna, što paśla takoha ŭdałaha sezonu, bolšaść futbalistaŭ kamandy atrymać zaprašeńni z dobrych eŭrapiejskich i rasiejskich klubaŭ. Razam z tym, praktyčna nichto nie sumniajecca, što i naleta BATE budzie siarod hałoŭnych favarytaŭ na zołata nacyjanalnaha pieršynstva.
Źmicier Pankaviec
