«Nieabchodnaści va ŭviadzieńni vojskaŭ va Ukrainu niama», — zajaviŭ na ekstranaj pres-kanfierencyi ŭ Maskvie Uładzimir Pucin.
Adnak, zajaviŭ jon, takaja mahčymaść u Rasii jość. Jurydyčna jon abhruntavaŭ jaje zvarotam «lehitymnaha prezidenta Ukrainy» Viktara Janukoviča.
Pucin havaryŭ paśpiešliva i vyhladaŭ mituślivym, niervovym. Jon taratoryŭ, pierabivaŭ žurnalistaŭ.
«Što moža pasłužyć padstavaj dla vykarystańnia Uzbrojenych siłaŭ? Viadoma, krajni vypadak», — skazaŭ Pucin.
Pucin paŭtaryŭ mantru rasijskaj prapahandy pra biasčynstvy nacyjanalistyčnych i nacysckich siłaŭ u Kijevie. I zajaviŭ, što Maskva pakidaje za saboj prava vykarystoŭvać usie najaŭnyja ŭ jaje rasparadžeńni srodki dla «abarony ruskamoŭnych hramadzian Ukrainy».
«Ja razumieju, darečy kažučy, tych ludziej na Majdanie — choć ja nie vitaju sam fakt źmieny ŭłady takim čynam, ja razumieju, tym nie mienš, tych ludziej na Majdanie, jakija da hetaha času patrabujuć nie niejkich tam ramontaŭ fasada ŭłady, a radykalnych pieramienaŭ», — skazaŭ Pucin. «Mienavita čamu jany patrabujuć — bo jany ŭžo pryvykli, što adnych žulikaŭ mianiajuć na inšych žulikaŭ i prajdziśvietaŭ».
Dziejańni vojskaŭ u Krymie jon apraŭdvaŭ tym, što «ŭ Krym užo padciahvalisia nacyjanalistyčnyja siły». «My heta zrabili, i my heta zrabili pravilna». «Ja sychodžu z taho, što va Uschodniaj Ukrainie ničoha hetaha rabić nie pryjdziecca».
Pucin zaklikaŭ «tych, chto ličyć siabie lehitymnaj uładaj Ukrainy» «paśpiašyć z praviadzieńniem adpaviednych pracedur», bo «demakratyčnaha mandata ŭ ich niama».
Pucin admoviŭsia raskazać detali svaich pieramovaŭ z prezidentam ZŠA i kanclerkaj Niamieččyny, patłumačyŭšy heta zakrytym charaktaram razmovaŭ. Jon paviedamiŭ, što ŭ adkaz na krytyku ŭvarvańnia va Ukrainu jon pryvioŭ prykład dziejańniaŭ ZŠA ŭ Afhanistanie. Misiju ŭ Krymie jon nazvaŭ «humanitarnaj». «My nie stavim na mecie kahości paniavolić».
Krainy Zachadu jon nazyvaŭ «partniorami». Adnak abvinavaciŭ ich u padtrymcy «pieravarotu» va Ukrainie. I źviarnuŭ uvahu, što «ŭsio heta» pačałosia paśla taho, jak Janukovič admoviŭsia padpisać Damovu ab asacyjacyi ź ES. Pa jaho słovach, kali krainy Zachadu zachočuć nanieści škodu dvuchbakovym adnosinam, to hetaja škoda budzie ŭzajemnaj.
Pucin daŭ zrazumieć, što Maskva pryznaje novyja ŭłady Kijeva paśla praviadzieńnia novych vybaraŭ, a da taho momantu kantakty z Ukrainaj buduć ažyćciaŭlacca na ŭzroŭni premjeraŭ, bo dla jaho samoha
Pucin zajaviŭ, što ŭ Krymie dziejničali nie rasijskija sałdaty, a miascovyja siły samaabarony. A forma? Jany jaje kupili ŭ kramach, jana ŭsiudy dastupnaja, skazaŭ Pucin.
Prezident Rasii zajaviŭ, što jany nie razhladajuć mahčymaści dałučeńnia Kryma. Ale jon adznačyŭ, što kali kasavaram było dazvolena vyznačyć svoj los, to i Krym takoje prava maje i «Rasija nie budzie pieraškadžać, kab Krym sam vyznačyŭ svoj ułasny los».
«My budziem stajać zzadu, i niachaj jany [ukrainskija vojski] pasprabujuć stralać u žančyn i dziaciej», — skazaŭ Pucin u adkaz na toje, ci nie turbuje jaho toje, što moža pačacca vajna.
Pucin skazaŭ, što nie maje namieru adklikać pasła z ZŠA.
Havoračy pra adnosiny ź Jeŭrasajuzam, Pucin adznačyŭ, što Janukovič nie admaŭlaŭsia padpisvać Asacyjacyju ź ES, a prosta adkłaŭ jaje, bo Ukraina była nie hatovaja pierajści na jeŭrapiejskija pramysłovyja standarty. «Kaliści Rasija taksama moža pierajści na ich», — zaznačyŭ jon.
«Palityčnaje žyćcio Ukrainy pieratvaryli ŭ fars, uvohule nijakaj kanstytucyi nie vykonvajuć», — krytykavaŭ jon Ukrainu.
Uładzimir Pucin taksama zajaviŭ, što, na jahonuju dumku, palityčnaj budučyni ŭ Viktara Janukoviča niama, a prytułak jamu dali vyklučna z humanitarnych mierkavańniaŭ.
«Janukovič žyvy i jašče prastudzicca na pachavańni tych, chto jamu zła žadaje», — skazaŭ Pucin u adkaz na pytańnie, ci ŭsio ŭ paradku ź Janukovičam.
Pytańnie: Vy spačuvajecie Janukoviču?
Pucin: U mianie da jaho inšyja pačućci.
Pucin zajaviŭ, što daručyŭ uradu adnavić kantakt ź ich ukrainskimi kalehami. Adnak jon zajaviŭ, što «Hazprom» u nastupnym kvartale nie daść bolš Ukrainy źnižki za haz.
Pucin dvojčy adznačyŭ, što ličyć spraviadlivym žadańnie Majdanu abnavić palityčnuju sistemu Ukrainy. «Źmiena ŭłady sapraŭdy, miarkujučy pa ŭsim, patrebna va Ukrainie, ale tolki lehitymnym šlacham, a nie papirajučy jaho».
Pa jaho słovach, Maskva hatovaja pracavać ź lubym novym lidaram krainy, akramia krajnich nacyjanalistaŭ. Jon nie vyklučyŭ, što na chvali pieramienaŭ va ŭładzie ŭ Kijevie «jak čort z tabakierki moža vyskačyć niejki nacyanaluha».
Uładzimir Pucin nie bačyć pieraškod dla pryjezdu ŭ Rasiju eks-premjera Ukrainy Julii Cimašenki, ale nahadvaje, što jana zaraz nie zajmaje nijakaj pasady va Ukrainie.