«Vova, dadomu! Nam abarona nie patrebna!» — skandavali ŭdzielniki antyvajennaha mitynhu ŭ Daniecku ŭviečary ŭ aŭtorak. Aktyvisty damovilisia pra mitynh u sacsietkach. Sabralisia kala Śviata-Preabraženskaha kafiedralnaha sabora UPC Maskoŭskaha patryjarchatu, dzie raniej źbiralisia cituški ŭ padtrymku «Bierkuta» i Janukoviča.
U mitynhu pryniali ŭdzieł da 1,5 tys. čałaviek. «Danbas+Ukraina = my razam», «Ruskija sałdaty, vas čakajuć doma», «Ukraina adzinaja!», «Danbas i Krym — Ukraina!» — takija płakaty padrychtavali mitynhoŭcy.
Prysutnyja kryčali: «Hubarava — na nary!» i «Danieck, ustavaj!». Hetak vykazvali staŭleńnie da sieparatystaŭ, jakija zachapili Danieckuju administracyju i paprasili Pucina, kab ŭvioŭ «miratvorčyja» vojski.
Udzielniki nie pramaŭlali pramovaŭ. Razmachvali ściahami i ściažkami. Śpiavali himn i skandavali patryjatyčnyja łozunhi. Niekatoryja skardzilisia, što nie zmahli kupić nacyjanalny ściah, jaki staŭ u Daniecku deficytam. Pryznavalisia, što nie brali ŭdzieł u akcyjach Jeŭramajdanu, pakolki być ukrainskim patryjotam u Daniecku — heta strašna.
Na supraćlehłym baku vulicy Arcioma sabrałasia niekalki dziasiatkaŭ prychilnikaŭ samaabvieščanaha kiraŭnika vobłaści Paŭła Hubarava, čyje tavaryšy paviesili nad administracyjaj ściah Rasii. Vykryknuŭšy «Ros-si-ja!», «Dałoŭ ŭkrainskuju akupacyju!» i jašče paru prynižalnych prapanoŭ, jany padyści nie advažylisia.
Siarod udzielnikaŭ antyvajennaj akcyi było šmat studentaŭ. Byli i danieckija ultras.
Padčas apošniaha matču na «Danbas-Arenie» fanaty «Šachciora» prakryčali «Słava Ukrainie», ale stadyjon adkazaŭ na heta niezadavolenymi vokličami. A kali była abvieščanaja chvilina maŭčańnia pa zahinułych u Kijevie, siektar, na jakim znachodzilisia hości z Rasii, pačali skandavać: «Bierkut!»
U niadzielu kala pomnika Šaŭčenki adbyŭsia stychijny mitynh suprać vajny, na jaki pryjšło kala 50 hramadzian. Słovy: «Słava Ukrainie!» i «Pucin, preč!» pryviali ŭ ahresiŭnyja stan apanientaŭ. Ruskija i miascovyja pucincy pačali śviścieć, pakazvać nieprystojnyja žesty i śviścieli ŭ bok ukrainskich patryjotaŭ. Ruski nacyjanalist Hubaraŭ kaža, što «paŭdniova -ŭschodniaja Ukraina — heta histaryčnaja Navarosija, ziamla, pa sutnaści, ruskaja i Ukrainie nikoli nie naležyła».
