Ukrainski miljarder, prezident chołdynhu SKM Rynat Achmietaŭ kateharyčna vystupiŭ suprać raskołu Ukrainy i zaklikaŭ Rasiju vyrašyć kanflikt dypłamatyčnym šlacham.
Pra heta 6 sakavika jon zajaviŭ u kamientary žurnalistam u Daniecku, paviedamlaje «Dzierkało tižnia».
«Ukraina pieražyvaje zaraz niaprosty čas. My pavinny pieražyć jaho i stać macniej. Ja za mocnuju, niezaležnuju i cełasnuju Ukrainu», — skazaŭ Achmietaŭ.
Jon padkreśliŭ, što prarasiejskija nastroi ŭ niekatorych rehijonach nie dajuć padstavy kazać pra raskoł krainy:
«Uschod Ukrainy — heta taksama Ukraina. Pramysłovy rehijon, žychary jakoha chočuć žyć hodna, jak i kožny ukrainiec. Usio pavinna vyrašycca mirnym, dypłamatyčnym šlacham. Rasija — naš siabar, naš stratehičny partnior», — adznačyŭ Achmietaŭ.
Razam z tym jon ličyć, što Rasija pavinna prajaŭlać bolš pavahi da suvierenitetu Ukrainy:
«My pavažajem Rasiju, pavažajem braterski rasijski narod. Ale heta pavinna być vulica z dvuchbakovym rucham. My zasłuhoŭvajem adpaviednaj pavahi», — padsumavaŭ Achmietaŭ.
