Dla baraćby z afrykanskaj čumoj śviniej Litva pabuduje zaharodu na miažy ź Biełaruśsiu.
Litoŭskaje Ministerstva sielskaj haspadarki pryniało rašeńnie vydzielić srodki dla zbudavańnia zaharody ŭzdoŭž litoŭska-biełaruskaj miažy. «Jana budzie pabudavana ŭ rajonach, dzie z-za ŭspyški infiekcyi abjaŭlena nadzvyčajnaja situacyja», — paviedamiŭ žurnalistam kiraŭnik viedamstva Vihilijus Jukna.
Na hetyja mety ministerstva vydzieliła 1,9 młn. litaŭ (600 tys. jeŭra). Nadzvyčajnaja situacyja była abjaŭlenaja 24 studzienia ŭ šaści litoŭskich samakiravańniach u suviazi z zafiksavanymi vypadkami zaražeńnia AČS u dzikaj pryrodzie. Zaharoda pavinna nie dapuścić mihracyi žyvioł i pieranosu zachvorvańnia.
Usia miaža Litvy ź Biełaruśsiu składaje 678 km. Vilnia vykazała žadańnie pabudavać zaharodu mienavita takoj praciahłaści i zapytała na heta srodki ŭ Brusela.
«Litva źjaŭlajecca źniešniaj miažoj Jeŭrasajuza, tamu ŭ dziejnaści zachadaŭ zacikaŭlenaja ŭsia Jeŭropa», — zajaviŭ kiraŭnik Vieterynarna-charčovaj słužby Jonas Milus.
Zhodna z padlikami litoŭskaha boku, prahrama baraćby ŭ Litvie z AČS, jakaja ŭklučaje budaŭnictva na KPP anharaŭ dla dezinfiekcyi transpartu, što nakiroŭvajecca cieraź miažu, manitorynh, pavieličeńnie łabaratornych mahutnaściaŭ, abstalavańnia pa ŭtylizacyi zdochłych žyvioł, moža abyścisia ŭ 20 młn. jeŭra.
