Miečysłaŭ Hryb, pad staršynstvam jakoha Viarchoŭny saviet 15 sakavika 1994 hoda pryniaŭ Kanstytucyju Biełarusi, nie moža adkazać, jakija papraŭki ŭ asnoŭny zakon choča ŭnieści Alaksandr Łukašenka.
«Ja nie viedaju, što jašče treba hetamu čałavieku. Jon sam nazyvaŭ siabie aŭtaram papravak u Kanstytucyju. Nie razumieju, što jašče jamu treba ad jaje», — zajaviŭ Hryb, vystupajučy 15 sakavika na pasiadžeńni sojma Partyi BNF.
Ab tym, što ŭ budučyni mahčyma pryniaćcie novaj Kanstytucyi, Łukašenka zajaviŭ 14 sakavika na sustrečy z sudździami Kanstytucyjnaha suda.
Na dumku staršyni Partyi BNF Alaksieja Janukieviča, zajava ab mahčymaści ŭniasieńnia źmianieńniaŭ u Kanstytucyju mahła być vyklikanaja sprobaj daviedacca,
jak «adreahuje dziaržaŭny aparat na mahčymaści zdačy suvierenitetu» na karyść Rasii.
Hryb paviedamiŭ, što Kanstytucyja ŭ 1994 hodzie prymałasia «dastatkova demakratyčnym šlacham, biez umiašańnia partyjnaha kiraŭnictva». Prajekt dakumienta nakiroŭvaŭsia ŭ Vieniecyjanskuju kamisiju, inšyja arhanizacyi, ź jakich «u asnoŭnym pastupali stanoŭčyja acenki».
Pavodle słoŭ byłoha staršyni Viarchoŭnaha savieta, sprečnym pry abmierkavańni prajekta Kanstytucyi było moŭnaje pytańnie, ale ŭ vyniku «ŭpieršyniu byŭ ustanoŭleny status biełaruskaj movy jak dziaržaŭnaj».
Hryb taksama adznačyŭ, što na 1994 hod Kanstytucyja była «dobrym asnoŭnym zakonam». Kali ž, adznačyŭ jon, budzie vyrašana viarnucca da Kanstytucyi 1994 hoda, u jaje pryjdziecca ŭnieści źmianieńni, u pryvatnaści, jakija tyčacca miascovaha samakiravańnia i prezidenctva.
