Vusnami hałoŭnakamandujučaha VPS Rasii Viktara Bondarava Maskva 17 sakavika, nazaŭtra paśla krymskaha refierendumu, jaki pastaviŭ na vušy ŭvieś śviet, zajaviła, što «da kanca hoda na aeradromie Baranavičy, dzie znachodzicca našaja avijabaza, budzie razhornuty połk Su-27SM3 u składzie dźviuch eskadryllaŭ — usiaho 24 mašyny».
Maskva naroščvaje vajskovuju prysutnaść
Ludziam daśviedčanym skupaja fraza rasijskaha hienierała kaža pra mnohaje.
Pačniem z taho, što, jak adznačyŭ u kamientary dla Naviny.by kiraŭnik analityčnaha prajekta Belarus Security Blog Andrej Parotnikaŭ, «de-jure bazy jašče niama, prynamsi ab padpisańni takoj damovy nie paviedamlałasia, ale rasijski hienierał, mahčyma, viedaje bolš za nas».
Dadam ad siabie: nie vyklučana, što rasijskija stratehi pra farmalnaściami prosta kłapociacca:
hałoŭnaje, što Maskva tak vyrašyła, a biełaruski partnior, jaki krucicca jak vuž na patelni, — nu kudy jon dzieniecca? Haz, naftu i hrošy daje Minsku Kreml.
I toje, što siońnia jon vykručvaje biełaruskamu načalstvu ruki ŭ vajenna-palityčnych pytańniach, — sakret Pališyniela, jaki vydaŭ dniami nie chto inšy, jak sam Łukašenka.
Spačatku na pasiadžeńni Savieta biaśpieki 12 sakavika ŭ Minsku jon zajaviŭ, što heta Biełaruś prosić Rasiju dasłać 12-15 samalotaŭ dla ŭzmacnieńnia našaha pavietranaha ščyta ŭ suviazi z uzrosłaj aktyŭnaściu NATO (pry hetym ni słova pra toje, što zachodnikaŭ uzdybiła rasijskaja avantura ŭ Krymie). Ale litaralna nazaŭtra biełaruski hałoŭnakamandujučy, aburyŭšysia, što maskoŭskija kanały padajuć jaho jak bajaźliŭca i panikiora, «źliŭ» stratehičnaha sajuźnika: «Vy lepš skažycie, što vy daŭno prosicie ŭ nas heta, i ja ŭžo tut, viedajecie, roznymi vykrutasami, užo ja prapanavaŭ, kab Rasija pryjechała i tut pryziamliłasia».
Pikiroŭka pikiroŭkaj, a sprava zroblenaja: u toj ža dzień šeść rasijskich źniščalnikaŭ Su-27 i try vajenna-transpartnyja samaloty ździejśnili pieralot na aeradrom «Babrujsk». A na aeradrom «Baranavičy» pieradysłakavany rasijski samalot dalokaha znachodžańnia A-50, anałah amierykanskaha AVAKSa.
Praŭda, heta byccam časova, u ramkach pravierki bajavoj hatoŭnaści Adzinaj rehijanalnaj sistemy SPA. A voś avijabaza — heta ŭžo surjozna i nadoŭha.
Zamiest «čystych» pierachopnikaŭ — udarnyja samaloty
I voś tut varta padkreślić druhi pryncypovy momant u skupoj zajavie kamandujučaha VPS Rasii.
U minułym hodzie važnyja piersony i z rasijskaha, i ź biełaruskaha boku viali razmovy ab raźmiaščeńni avijabazy ŭ Lidzie. Ciapier jak vyrašany varyjant padajecca aeradrom u Baranavičach, jaki — zirnicie na kartu — značna bližejšy da Ukrainy.
I narešcie, jašče adzin važny momant. Kali ŭ jakaści pieršaj łastaŭki na bajavoje dziažurstva ŭ Baranavičach zastupiła ŭ śniežni źviano rasijskich Su-27P, to ciapier Maskva maje namier raźmiaścić tam na pastajannaj asnovie ceły połk Su-27SM3.
Cyvilnamu čajniku roźnica ŭ litarkach madelaŭ ni pra što nie kaža. Biełaruski vajskovy ekśpiert Alaksandr Alesin u kamientary dla Naviny.by rastłumačyŭ: «P» aznačaje «pierachopnik», heta značyć jon zatočany pad zadačy SPA. A voś Su-27SM3 — značna bolš surjoznaja, ciažkaja bajavaja mašyna: «Heta šmatfunkcyjanalny ŭdarny źniščalnik z bajavym radyusam 1500 kiłamietraŭ, jaki maje šyrokija mahčymaści dla parazy naziemnych i nadvodnych metaŭ».
Na takija samaloty, adznačaje ekśpiert, «možna naviešvać praktyčna luboje taktyčnaje ŭzbrajeńnie, jakoje jość ciapier u rasijskich VPS, u tym liku kiravanyja bomby, vysokadakładnuju zbroju».
Z Baranavičaŭ — na bambiožku Kijeva?
Analityk pierakanany, što mienavita kanflikt z Ukrainaj nakłaŭ adbitak na płany Rasii adnosna raźmiaščeńnia avijabazy ŭ Biełarusi: dla hetaha abjekta vybrany inšy punkt i inšaja, bolš mahutnaja zbroja.
Alesin padkreślivaje, što kali ciapierašniaje napružańnie pamiž Maskvoj i Kijevam pieraraście (nie daj boh!) u realnyja bajavyja dziejańni, to hetyja samaloty całkam mohuć vykarystoŭvacca dla padtrymki rasijskich vojskaŭ i naniasieńnia ŭdaraŭ pa naziemnych abjektach na ŭkrainskaj terytoryi.
Andrej Parotnikaŭ, sa svajho boku, adznačaje, što 24 adzinki Su-27SM3 — heta pałova, a moža, i bolšaja častka ŭsioj takoj techniki, što maje Rasija. «Jany pierakidvajuć siudy ŭdarnuju madyfikacyju mašyn, i heta nie zastaniecca biez uvahi z boku susiednich dziaržavaŭ», — kaža analityk.
Na jaho dumku, Kreml Ukrainu ŭžo straciŭ, i ciapier pytańnie tolki ŭ tym, nakolki žorstkaha apanienta ŭ jaje abliččy atrymaje Rasija na svaich zachodnich miežach.
Druhoje vydańnie chałodnaj vajny
Za Ukrainaj ža tak ci inakš majačyć Zachad. Pry najhoršym raźvićci siužetu my možam atrymać druhoje vydańnie chałodnaj vajny.
U vypadku remiejku chałodnaj vajny «linija hetaha chałodnaha frontu projdzie pa našych zachodnich, paŭnočna-zachodnich, a ŭ dadatak ŭžo i pa paŭdniovych miežach», kaža Parotnikaŭ. I Minsku, padkreślivaje surazmoŭca Naviny.by, nie varta ŭ takim vypadku spadziavacca, što Zachad prahłynie adhavorki kštałtu: heta nie my zadumali, heta ŭsio Maskva.
«Biełaruś robicca zakładnicaj supraćstajańnia vialikich hieapalityčnych hulcoŭ», — adznačaje, sa svajho boku, Alesin. Na jaho dumku, «Alaksandru Łukašenku budzie vielmi ciažka manieŭravać, uchilacca».
Ekśpiert padkreślivaje, što raźmiaščeńnie pałka Su-27SM3 u Baranavičach — heta taksama i hrozny žest u bok Polščy, krain Bałtyi.
Amierykancy, reahujučy na ŭkrainski kryzis, užo pierakinuli ŭ Polšču pad markaj vučeńniaŭ 12 źniščalnikaŭ F-16 z bazy Avijana ŭ Italii. Hetyja mašyny, jak i Su-27SM3, zdolnyja nieści taktyčnuju jadziernuju zbroju. Takim čynam, patencyjna Biełaruś moža stać arenaj demanstracyi jadziernych muskułaŭ uschodniaha sajuźnika, jaki ŭvajšoŭ na hlebie ŭkrainskich padziej u klinč z nataŭcami.
I tady ŭsie nadziei Minska narmalizavać adnosiny ź ES, ZŠA — sabaku pad chvost. Sankcyi ž Zachadu suprać Maskvy rykašetam udarać i pa biełaruskaj ekanomicy, zaviazanaj na Rasiju značna macniej, čym chaciełasia b, zychodziačy ź mierkavańniaŭ nacyjanalnaj biaśpieki.
«Chałodnaja vajna z Zachadam nie pakinie Biełarusi mahčymaści hieapalityčnaha manieŭru»,
— adznačyŭ u kamientary dla Naviny.by minski mižnarodny ahladalnik Andrej Fiodaraŭ. Pavodle jaho słovaŭ, u Maskvy zanadta šmat mahčymaściaŭ «zacisnuć palcy» biełaruskamu kiraŭnictvu.
Na fonie krymskaj avantury Kramla pavisajuć u pavietry zajavy Minska ab niezaležnaj zamiežnaj palitycy, kaža Fiodaraŭ: «Robicca vidavočna, što realna Biełaruś — u roli rasijskaha satelita, i ciapier davodzicca vybirać tolki pamiž drennymi i vielmi drennymi varyjantami».
Biełarusam znoŭ daviadziecca hnić u akopach?
Siońnia ŭ prarasijskaj publiki ŭ Biełarusi, u tym liku abyvacielaŭ, zambavanych maskoŭskaj šavinistyčnaj prapahandaj, ejfaryja u suviazi z tryumfalnym, jak zdajecca hetym ludziam, vynikam krymskaha refierendumu. Ale pachmielle moža być horkim. I dla samich krymčan, i dla rasijcaŭ, i dla ŭsioj Biełarusi.
Našu krainu, pa jakoj užo stolki razoŭ prakatvalisia spustašalnyja vojny, znoŭ sprabujuć uciahnuć u vyśviatleńnie adnosin pamiž hłabalnymi centrami siły.
I navat kali nie dojdzie da haračaj fazy, da realnaj vajny, Biełaruś ryzykuje nadoŭha zatrymacca ŭ akopach novaha supraćstajańnia z Zachadam, što bje pa jaje šancach na cyvilizavanaje raźvićcio.
