ATF
Turystyčnyja kampanii, jakija specyjalizujucca na adpačynku ŭ Krymie, kanstatujuć masavyja admovy ad turaŭ na tamtejšyja kurorty. Najpierš pałochaje pierapadparadkavańnie paŭvostrava Rasiei, što robić niapeŭnaj sytuacyju ź biaśpiekaj.
Krymski kirunak zaŭsiody pryvablivaŭ biełarusaŭ, bo nie vymahaŭ asablivych prablemaŭ z dajezdam i pražyvańniem. Ciapier ža sytuacyja ŭskładniajecca: usio idzie da taho, što da biełaruska-ŭkrainskaj miažy dadasca ŭkrainska-rasiejskaja, paśla jakoj — nieviadomaść «abnoŭlenaha» Krymu. Dyrektar turystyčnaha partału Holiday.by Andrej Baraška kaža: zastajucca pryvidnyja spadziavańni, što sytuacyja stabilizujecca da pačatku leta, a pakul što klijentam prapanujecca alternatyva — Litva, Łatvija, Baŭharyja:
«Viedajecie, u momant maksymalnaha napału žarściaŭ naŭrad ci chto tołkam skaža, što adbyvajecca i čym usio skončycca. Tamu vidavočna, što turpatok u Krym nia toje što padaje, a jaho niama ŭvohule! Heta ŭžo nie sakret — chutčej, kanstatacyja».
«I pakul buduć praciahvacca dramatyčnyja palityčnyja padziei, ničoha da lepšaha nia źmienicca. Najpierš, niemahčyma pradkazać ich vynik, pa-druhoje, dzie harantyi, što nas tam uvohule čakajuć?»
«To bok — dziejnaść turystyčnych kampanijaŭ zamierła, i dakładna hetaksama sočać za raźvićciom sytuacyi ludzi, nia robiačy aktyŭnych dziejańniaŭ».
34-hadovy Alaksiej Pirahoŭ z ukrainskaha Mikałajeva niekalki apošnich hadoŭ u letnija miesiacy padpracoŭvaŭ administrataram u hatelach na paŭdniovym bierazie Krymu. Ale sioleta haspadary «mabilizacyju» kadraŭ admianili:
«Adnosna sezonu mahu skazać: jaho dakładna nia budzie. Što b tam chto ni pisaŭ u internecie — maŭlaŭ, prarviemsia — usio heta łuchta. Čytaŭ dziŭnyja pasty, što źbiraŭ hrošy ledź nie na Tureččynu, ale takaja vydatnaja mahčymaść pabyvać u Krymie, to pajedu tudy. Heta śmiešna! Na samoj spravie sezonu nia budzie, maje znajomyja, jakija vałodajuć hatelami na paŭdniovym bierazie Krymu (maleńkija pryvatnyja hatelčyki na mory), persanał navat nie nabirajuć. Pra jaki sezon moža być havorka? Ruskija dakładna ŭ Sudak nie pajeduć. Navošta, jaki sens, kali jość Sočy? Jak by śmiešna ni hučała, nia tak jano i tanna. Z adnaho boku, mnohija ličać, što Krym — biudžetny adpačynak. Ź inšaha — z čym paraŭnoŭvać? Kali paraŭnoŭvać z Baŭharyjaj ci Tureččynaj, Krym užo realna prajhraje. Kali z Tajlandam, to vyjhrajem, choć nie našmat. Tamu adpačynak u Krymie, nia viedaju, pieradusim dla tych, chto lubić Saviecki Sajuz i toj servis. Ale płacić užo siońniašnimi hrašyma».
Na fonie straty Krymu raspraŭlaje plečy Chersonskaja vobłaść — biełarusy jašče raniej adkryli dla siabie Žalezny port, Skadoŭsk, Łazurnaje, dzie adpačynak tańniejšy, čym u patasnaj Jałcie.
Rasiejski pradprymalnik Alaksiej Dudzinaŭ niekalki hadoŭ tamu pačaŭ zajmacca polikulturnymi prajektami na poŭdni Ŭkrainy i pierakanany: realnaj zamienaj Krymu stanuć čarnamorskaje i azoŭskaje ŭźbiarežžy pamiežnaj Chersonskaj vobłaści:
«Ja pierakanany, što sa strataj Krymu jak miesca «pałomnictva» turystaŭ taja ž Chersonskaja vobłaść nia tracić, a tolki nabyvaje. Bo kali ludzi pačnuć bajacca jechać u Krym u suviazi z rasiejskaj akupacyjaj paŭvostrava, to Cherson nieŭzabavie stanie dla turystaŭ druhim Krymam. Pryčym jak dla ŭkraincaŭ, tak i dla inšych narodaŭ z SND. Darečy, tyja ž biełarusy ŭ masie svajoj i tak jeździać u Chersonskuju vobłaść: pa-pieršaje, tut tańniej, pa-druhoje, servis nie našmat horšy. Da taho ž usie investycyi, jakija ŭkrainskaja dziaržava budzie nakiroŭvać na raźvićcio turyzmu, nadalej pojduć na ŭsie hetyja kurorty — i Čornaha, i Azoŭskaha moraŭ».
Pakul zastajecca pad pytańniem los biełaruskaj ułasnaści na kurorcie Mischor.
Sanatoryj Kiraŭnictva spraŭ prezydenta «Biełoruśsija», što pablizu horadu Ałupka, pa-raniejšamu prapanuje azdaraŭlenčyja pasłuhi. Ale što budzie ŭ suviazi z terytaryjalnym pieradziełam — u sanatornaj administracyi pakul nia viedajuć:
«Miarkujem, što ničoha nia źmienicca. Prynamsi, nie pavinna. Uładalnikam zastajecca biełaruski bok, a voś terytaryjalna z kim vyrašać dalejšyja adnosiny — heta treba hladzieć. Zastajecca tolki čakać, jakaja budzie ŭłada. I kali ŭłada budzie rasiejskaja, napeŭna, buduć padpisanyja adpaviednyja papiery ŭžo nie z ukrainskim bokam, a z rasiejskim. Abo, mahčyma, heta ŭsio ž budzie niejkaja aŭtanomija. Pakul što ciažka pradbačyć, da čaho ŭrešcie pryjduć».
Tym časam samaabvieščanyja krymskija ŭłady ŭžo raspačali «raśpił» łasych kavałkaŭ turystyčnaj haliny.
Tak, prezydent Čačni Ramzan Kadyraŭ zajaviŭ, što damoviŭsia nakont supracoŭnictva z kiraŭnikom krymskaha ŭradu Siarhiejem Aksionavym. U pryvatnaści, kadyraŭski biznesoviec Rusłan Bajsaraŭ užo hatovy zaniacca «azdaraŭleńniem» šerahu krymskich kurortaŭ, kab kardynalna padvysić turystyčny patok. Pryncypovaja zhoda z boku Aksionava atrymanaja.
Z pryčyny dramatyčnych padziejaŭ Ukraina stračvaje i tranzytnuju pryvabnaść.
Tak, biełaruskija turkampanii, jakija specyjalizujucca na adpačynku ŭ Baŭharyi, majuć namier admovicca ad zvykłaha maršrutu i vazić turystaŭ praz Polšču. U vyniku šlach padoŭžycca sama mieniej na 300 kilametraŭ, što znojdzie adlustravańnie ŭ pieraraźliku transpartnych koštaŭ, a z klijentaŭ budzie spahaniacca dadatkovy zbor za tranzytnuju vizu praz šenhienskuju zonu.
