«Nie čakajem, što Biełaruś udaryć nas u śpinu. Upeŭnieny, što nie ŭdaryć», — zajaviŭ u intervju BiełaPAN pasoł Ukrainy ŭ Biełarusi Michaił Ježal, adkazvajučy na pytańnie, ci nie apasajecca Ukraina taho, što Biełaruś moža pryniać bok Rasii ŭ rasijska-ŭkrainskim kanflikcie.
Ježal nahadaŭ, što raniej aficyjnyja pradstaŭniki Biełarusi ŭžo vykazvalisia ŭ padtrymku terytaryjalnaj cełasnaści Ukrainy. «My ŭdziačnyja Biełarusi za jaje ŭzvažanuju pazicyju. Biełaruś zaniała dakładnuju pazicyju ab niedatykalnaści našych miežaŭ i cełasnaści terytoryi», — skazaŭ ukrainski pasoł.
Ježal padkreśliŭ, što dla Ukrainy vielmi važnaja hetaja padtrymka, tamu što Biełaruś źjaŭlajecca adnym z najbližejšych jaje partnioraŭ.
Havoračy pra pierśpiektyvy raźvićcia adnosinaŭ pamiž dźviuma krainami, pasoł adznačyŭ: «Dumaju, što ŭ halinie palityčnaj usio budzie ŭ nas narmalna. U našych adnosinach ź Biełaruśsiu niama pryčyn dla źmianieńniaŭ, źjaŭleńniaŭ niejkich pretenzij adzin da adnaho».
Na pytańnie, ci niama va Ukrainy apasieńniaŭ nakont taho, što Kreml moža nacisnuć na biełaruskaje kiraŭnictva, Michaił Ježal adkazaŭ: «Vaš prezident užo skazaŭ: nichto na mianie nie cisnuŭ i nie budzie cisnuć. Jon śmieła i adkryta skazaŭ heta na ŭvieś śviet».
Nahadajem, 12 sakavika na pasiadžeńni Savieta biaśpieki Biełarusi Alaksandr Łukašenka zajaviŭ, što nijakaha nacisku z boku Kramla ŭ suviazi z padziejami va Ukrainie na jaho niama. «Na mianie nichto nie ciśnie, nijakija kramli i inšyja na mianie nikoli nie cisnuli. Tamu što heta, pa-pieršaje, bieśpierśpiektyŭna ci, jak kažuć dypłamaty, kontrpraduktyŭna. Na mianie niama čaho cisnuć».
