Delehacyja štab-kvatery NATA prybyła ŭ Biełaruś ź vizitam, jaki budzie pradaŭžacca da 21 sakavika, paviedamili ŭ pres-słužbie Minabarony Biełarusi.
Delehacyju NATA ŭznačalvaje načalnik upraŭleńnia płanavańnia sił departamienta abaronnaj palityki i płanavańnia Mižnarodnaha sakrataryjata Paŭnočna-Atłantyčnaha Aljansu Žan-Kłod Hańjon. U skład delehacyi taksama ŭvajšli vajennyja ataše dziaržaŭ-členaŭ NATA (Litvy, Polščy), akredytavanyja pry Ministerstvie abarony Biełarusi, i pradstaŭnik pasolstva Estonii ŭ Biełarusi, jaki vykonvaje funkcyi kantaktnaha pasolstva NATA.
Vizit prachodzić u ramkach udziełu Biełarusi ŭ Pracesie płanavańnia i acenki sił prahramy NATA «Partniorstva dziela miru» (PARP). Delehacyja Aljansu prybyła dla praviadzieńnia kansultacyj nakont prajekta met partniorstva ŭ 2014 hodzie. Ź biełaruskaha boku ŭ kansultacyjach prymajuć udzieł pradstaŭniki strukturnych padraździaleńniaŭ Minabarony, Hienštaba i Uzbrojenych Sił, jakija adkazvajuć za realizacyju met partniorstva, a taksama tyja, chto pradastaŭlaje spravazdačnuju infarmacyju ŭ ramkach PARP.
U chodzie vizitu zapłanavana praviadzieńnie dvuchbakovaj narady nakont prajekta karotkaha ahladu PARP, raspracavanaha Mižnarodnym sakrataryjatam NATA na asnovie infarmacyi, pradastaŭlenaj Biełaruśsiu. Jašče adna tema narady - vyniki realizacyi met partniorstva 2012 hoda, a taksama prajekt novaha pakieta met partniorstva ŭ 2014 hodzie.
«Praviadzieńnie hetaha mierapryjemstva daść mahčymaść realizavać daručeńni prezidenta Respubliki Biełaruś pa supracoŭnictvie z NATA, uzhadnić pytańni nakont prajekta karotkaha ahladu PARP, a taksama atrymać kansultacyi pa dasiahnieńni Respublikaj Biełaruś met partniorstva PARP i adpaviednuju dakumientacyju NATA», - taksama rastłumačyli ŭ Minabarony.
