Imknucca pradbačyć raźvićcio palityčnych pracesaŭ — amal toje samaje, jak davać prahnozy nadvorja. Va ŭmovach dynamičnaj rečaisnaści ŭsio moža źmianicca. Adnak, kali z časam adbyvajucca padziei, źviazanyja lohikaj, imaviernaść palityčnych prahnozaŭ pavialičvajecca. Prahladajucca tendencyi.
13 vieraśnia 2007 h. prezydent Rasiei U.Pucin pryznačyŭ premjer‑ministram Viktara Zubkova. 14 vieraśnia kandydatura Zubkova bała zaćvierdžanaja Dziaržaŭnaj Dumaj. Heta aznačaje kaniec intryhi, jakaja pryciahvała ŭvahu šmat času. Imia pierajemnika Pucina stała viadoma: heta Zubkoŭ.
Zubkoŭ — pierajemnik
Zubkoŭ — vychadziec ź picierskaj kamandy U.Pucina. Da pryznačeńnia dyrektaram Federalnaj słužby finansavaha manitorynhu, h.zn. finansavaj vyviedki, Zubkoŭ zajmaŭ kiroŭnyja pasady ŭ meryi Sankt‑Pieciarburhu, pracavaŭ tam z Pucinym.
Vyvučajučy palityčna‑psychalahičny partret Zubkova, možna pryjści da vysnovy, što Zubkoŭ padobny da Pucina ŭ tym sensie, što heta čałaviek, jaki «nie zdaje svaich». Jon nia zdaść Pucina. Budzie dziejničać u miežach kantraktu z Pucinym i jahonaj kamandaj. Taksama, jak raniej Pucin nia «zdaŭ» B.Jelcyna, A.Sabčaka, vykonvaŭ «kantrakt» ź Jelcynym.
Adnačasova Zubkoŭ — stały spraktykavany čałaviek. Vychadziec z rasiejskaj hłybinki, vioski. Dla jaho pryznačeńnie premjer‑ministram, nia kažučy pra pasadu prezydenta, — heta viaršynia palityčnaj karjery, mahčymaść upisać svajo imia ŭ palityčnuju historyju Rasiei.
Zubkova atačajuć «ludzi Pucina». Heta taksama stvaraje adpaviednyja harantyi padkantrolnaści Zubkova Pucinu.
V.Zubkoŭ ciaham piaci hadoŭ uznačalvaŭ finansavuju vyviedku. Jon byŭ pryznačany Pucinym na hetuju pasadu dla stvareńnia dadatkovaha vahara kantrolu nad palityčnaj elitaj i biznes‑supołkaj Rasiei. Maje kampramat na vielmi mnohich i pry nieabchodnaści moža vykarystać navat samu pahrozu vykarystańnia kampramatu.
U adroźnieńnie ad Ukrainy, dzie isnujuć niekalki finansava‑pramysłovych hrupaŭ, jakija vykarystoŭvajuć palityku, palityčny ŭpłyŭ jak instrument dla pieradziełu rynku, u Rasiei pry Pucinie była stvoranaja systema ŭłady‑ŭłasnaści, jakaja vyklučaje pretenzii kankurentnaj finansava‑pramysłovaj hrupy na viarchoŭnuju ŭładu. Paśla «spravy Chadarkoŭskaha» ŭ 2003 h., sudovaha pieraśledu šerahu aliharchaŭ, kamanda čynoŭnikaŭ i aliharchaŭ, jakuju ŭznačalvaje Pucin, zajmaje daminujučyja pazycyi ŭ systemie ŭłady‑ŭłasnaści, maje ŭ svaich rukach usie vahary palityčnaha ŭpłyvu (dziaržaŭny aparat, medyi). Kamanda Pucina na doŭhuju perspektyvu budzie vyznačać palityčny kurs Rasiei.
Pucin zastajecca
2‑ha kastryčnika na 8‑ym źjeździe «Adzinaj Rasiei» Pucin pryniaŭ prapanovu ŭznačalić vybarčy śpis «partyi ŭłady» na parlamenckich vybarach.
Sens padziei vielmi dobra rastłumačyŭ namieśnik staršyni parlamenckaj frakcyi «Adzinaj Rasiei» V.Vałodzin: «Uładzimier Pucin vyznačyŭ stratehičnaje raźvićcio Rasiei. Pucin zastajecca. Značyć, usio dobraje, što jon zrabiŭ, zastajecca». Byŭ zrobleny i adpaviedny pryhožy vobraz taho, jak Pucin zastajecca. Vybarčyja śpisy «Adzinaj Rasiei», u jakich pad numaram adzin byŭ adznačany Pucin, u CVK pryniesła pryhažunia ŭ čyrvonaj futbołcy, ź ličbaj 1 na śpinie i nadpisam bujnymi litarami: U.Pucin. Takim čynam, Pucin zastaŭsia nie jak asobny palityk, a jak faktyčny kiraŭnik usioj systemy ŭłady — vykanaŭčaj, zakanadaŭčaj i sudovaj ułady, pradstaŭlenaj «basmannym pravasudździem».
Uznačaliŭšy vybarčy śpis «Adzinaj Rasiei», jakaja pieramoža na parlamenckich «vybarach», Pucin moža vybirać: zaniać pasadu śpikiera parlamentu, premjer‑ministra albo šeraha kardynała. Jon užo ŭznačalvaŭ urad u peryjad žnivień‑śniežań 1999 h.
Pry ŭsich scenarach, majučy rejtynh na ŭzroŭni 70% i bolš, stvaryŭšy svaju kamandu, Pucin zastajecca haspadarom sytuacyi.
Perspektyvy biełaruska‑rasiejskich adnosinaŭ
Dla Biełarusi taki scenar budzie aznačać, što nie adbudziecca značnych źmienaŭ u palityčnym kursie Rasiei, u tym liku adnosna Biełarusi. Rasieja ličyć, što Łukašenka sam siabie zahnaŭ u kut, nia maje mahčymaściaŭ adkazać na cisk ź jaje boku. U hetych umovach Maskva ličyć, što za vykanańnie «ščyta», stratehičnaha sajuźnika, Biełarusi možna płacić mienš, samoj vyznačać, kolki płacić i za što. Pamier ekanamičnaj padtrymki budzie skaračacca. Ale ŭsie ž taki da niakryzisnaha ŭzroŭniu.
Rasieja budzie cisnuć na Łukašenku z metaj dabicca ad jaho sastupak u pytańni pakupki rasiejskimi kampanijami kantrolnych pakietaŭ akcyjaŭ najbolš važnych pradpryjemstvaŭ. Jašče ŭ traŭni 2001 h. tahačasny rasiejski premjer M. Kaśjanaŭ nazyvaŭ 30 pradpryjemstvaŭ, jakija choča nabyć rasiejski biznes. Takim čynam, Rasieja budzie imknucca ŭzmacnić svaje ekanamičnyja i palityčnyja pazycyi ŭ Biełarusi, nadziejna pryviazać da siabie.
Paśla ŭstalavańnia kantrolu nad enerhietyčnym sektaram, vialikaj častki ekanomiki, budzie ŭžo bolš mahčymaściaŭ uvieści rasiejski rubiel i značyć, kantralavać finansavuju systemu, usiu ekanomiku. Paśla čaho, pry ŭmovie zachavańnia ciapierašnich tendencyjaŭ u adnosinach Rasiei z Zachadam, vielmi imavierna, što znoŭ aktualizujecca pytańnie pašyreńnia rasiejskaj vajskovaj prysutnaści ŭ Biełarusi.
Biełarusam buduć tady kazać, što heta taksama absalutna rynkavy padychod: rasiejskija investycyi ŭ ekanomiku Biełarusi treba budzie abaraniać, padmacavać adpaviednym raźvićciom palityčnaj i vajennaj «intehracyi».
Adnak isnujuć abjektyŭnyja abmiežavańni cisku na Biełaruś z boku Rasiei. Pieršaje. Možna znoŭ istotna ŭskładnić suviaź Rasiei ź jaje Kalininhradzkim anklavam. Druhoje. Kali nia buduć zaklučanyja pahadnieńni pra košt na haz na prymalnych umovach, Łukašenka znoŭ budzie adbirać haz z ekspartnaha trubaprovadu: na 2008 h. Rasieja jašče nie atrymaje mahčymaściaŭ pieranakiravać adpaviedny abjem hazu eŭrapiejskim spažyŭcam, minujučy Biełaruś. Treciaje, mabyć, samaje istotnaje. Łukašenka moža pastavić pierad Rasiejaj hieapalityčnyja pytańni (SPA, perspektyva budaŭnictva ŭ Polščy i Čechii abjektaŭ PRA ZŠA, prasoŭvańnie na ŭschod vajennaj infrastruktury NATA, intehracyja ŭ NATA Hruzii i Ukrainy i h.d.). Nia majučy adkazu na pytańnie, chto, kali nie Łukašenka, budzie zabiaśpiečvać hetyja intaresy, Rasieja nia moža spynić ekanamičnuju padtrymku.
Rasieja i Zachad
Realizacyja prahramy doŭhaterminovaha kiravańńnia Pucina budzie źjaŭlacca dadatkovym faktaram ŭskładnieńnia adnosinaŭ Rasiei z Zachadam. Tamu što źjaviacca dadatkovyja padstavy mierkavać pra raźvićcio aŭtarytarnych tendencyjaŭ u Rasiei. Pry ŭchileńni ad demakratyčnych standartaŭ Rasieja stanovicca dla Zachadu ŭsio bolš nieprazrystym, niepradkazalnym partneram. Hałoŭnym čynam idzie havorka pra ŭskładnieńnie ŭ palityčnych adnosinach pry značnym infarmacyjnym supraćstajańni. Na handlova‑ekanamičnym supracoŭnictvie heta nie adabjecca. Buduć razdavacca hałasy pra nieabchodnaść vyklučeńnia Rasiei z «G8» i zamieny jaje Indyjaj i Brazylijaj.
Padčas kiraŭnictva Pucina hramadzkaja dumka rychtavałasia dla taho, kab «pravilna» adreahavać na abvinavačvańni Zachadu ŭ aŭtarytaryźmie. Naprykład, 30 vieraśnia rasiejskija telekanały pieradavali, što «CRU maje stratehiju razdrableńnia Rasiei da 2012 h.», što «źmianiajecca charaktar dziejnaści NATA, NATA stała instrumentam strymlivańnia, asłableńnia Rasiei». U toj ža dzień była pakazanaja šyroka anansavanaja aŭtarskaja prahrama papularnaha ŭ Rasiei teležurnalista A.Mamantava «Barchat.ru», dzie Zachad abvinavačvaŭsia ŭ padrychtoŭcy «aksamitnaj» revalucyi ŭ Rasiei. Heta adzin z frahmentaŭ infarmacyjnaha zabieśpiačeńnia «planu Pucina».
