Pavodle rasiejskaj presy, Siarhiej Jurenia pradavaŭ ahientam polskaj vyviedki dadzienyja pra stratehičnyja abjekty abjadnanaj systemy supraćpavietranaj abarony Biełarusi j Rasiei.
Praces, jaki raspačaŭsia 17 vieraśnia, adbyvaŭsia ŭvieś hety čas biez prysutnaści ŚMI j hramadzkaści. Śledztva suprać Jureni było raspačataje 6 sakavika 2007 hodu, pieršapačatkova jamu pahražała ad 12 da 20 hadoŭ turemnaha źniavoleńnia.
Pres‑sakratar sudu Alaksandar Minčanoŭski paviedamiŭ, što padsudny pryznaŭsia va ŭčynienych złačynstvach.
A. Minčanoŭski: Padčas sudovaha pracesu padsudny pryznaŭsia va ŭsich abvinavačańniach i vykazaŭ škadavańnie. Hetyja aspekty byli ŭziatyja pad uvahu pry vyniasieńni prysudu.
Prakuror Ramil Šakuraŭ, jaki patrabavaŭ dla Jureni 15 hadoŭ źniavoleńnia, zajaviŭ, što jon zadavoleny rašeńniem sudu. Šakuraŭ taksama paviedamiŭ, što Jurenia byŭ zaverbavany ŭ listapadzie 2005 hodu. Zatrymany aficer pradprymaŭ sprobu trapić u kadravy skład federalnych vorhanaŭ biaśpieki, to bok sprabavaŭ być padvojnym ahientam.
Jak paviedamlajuć rasiejskija hazety, u peryjad ad 2005 da 2006 hadoŭ Jurenia źbiraŭ infarmacyju nakont dyślakacyi, padparadkavańnia i ŭzbrajeńnia vajskovych častak Maskoŭskaj vajskovaj akruhi. Eksperty pryjšli da vysnovy, što infarmacyja, jakuju Jurenia pieradavaŭ polskim ahientam, była dziaržaŭnaj tajamnicaj.
Nahadaju, 14 vieraśnia Viarchoŭny sud Biełarusi prysudziŭ čatyroch biełaruskich aficeraŭ da turemnaha źniavoleńnia terminam ad 7 da 12 hadoŭ. Aficer rasiejskich uzbrojennych siłaŭ samastojna źviarnuŭsia ŭ FSB ŭ suviazi sa spravaj i padčas pracesu ŭ Miensku byŭ śviedkam.
Pavodle biełaruskaha KDB, ahientaŭ bolš za ŭsio cikaviła rakietnaja systema supraćpavietranaj abarony S‑300. Padazravany ŭ arhanizacyi sietki biełarus, jak paviedamiła KDB, byŭ zatrymany padčas pieradačy infarmacyi na Zachad.
