28—29 kastryčnika ŭ mnohich pratestanckich cerkvach Biełarusi prajšli malebny‑pakajańni «za hrachi kamunizmu», prymierkavanyja da Dnia paminańnia prodkaŭ. Pra heta paviedamiŭ BiełaPAN pastar minskaj carkvy «Jan Pradvieśnik» Abjadnanaj carkvy chryścijan viery jevanhielskaj u Respublicy Biełaruś Antonij Bokun.

Pavodle jaho słoŭ, u carkvie «Jan Pradvieśnik» pierad pačatkam malitvy viernikam byli pradstaŭleny videamateryjały z uspaminami žycharoŭ Biełarusi, jakija pieražyli stalinskija represii.

U staličnaj jevanhielskaj carkvie «Božaja Łaska» vierniki pačuli apoviedy ludziej, jakija pieražyli ŭ hady savieckaj ułady hanieńni za vieru. Rehijanalny pastar Vasil Malec kazaŭ pra miljony niavinna zahublenych žyćciaŭ, jakija byli pryniesienyja ŭ achviaru kamunizmu, a taksama zaznačyŭ, što «naša ziamla poŭnaja pomnikami tym ludziam, jakija biezzakońnie ŭviali ŭ ranh zakona». U svajoj malitvie vierniki prasili Boha ab tym, kab «čornaje kamunistyčnaje minułaje nikoli nie adradziłasia na biełaruskaj ziamli». Pastar carkvy «Dar Božy» Aleh Akulenka ŭ svajoj propaviedzi asabliva padkreśliŭ, što carkvie dadziena ŭłada i adkaznaść pierad Boham za padziei, što adbyvajucca ŭ krainie.

U svaju čarhu pastar staličnaj «Carkvy Isusa Chrysta» abjadnańnia abščyn chryścijan poŭnaha Jevanhiella ŭ Respublicy Biełaruś Barys Čarnahłaz padčas malebna padkreśliŭ: budučaje naroda zaležyć ad jaho staŭleńnia da minułaha.

«Carkva pavinna bačyć biedstva naroda i źviartać uvahu nie tolki na simptomy prablem, ale i na duchoŭnyja karani realnaści, što nas akružaje. Tolki pakajańnie va ŭčynienych hrachach biazbožnaści i čałaviekazabojstva dazvolić adradzicca biełaruskamu narodu», — upeŭnieny pastar.

Marat Haravy, BiełaPAN

Клас
Панылы сорам
Ха-ха
Ого
Сумна
Абуральна