Biełaruskuju kuchniu možna pakaštavać u nievialikim amierykanskim horadzie Chihinśvili ŭ štacie Misury. Restaran The Belarusian Baker, što ŭ pierakładzie značyć «biełaruski piekar», trymaje siamja Korderaŭ: biełaruska Natalla i jaje muž Poł.
Natalla apynułasia ŭ ZŠA, kali pabrałasia šlubam z pastaram Połam. Jana jašče ŭ Minsku pracavała piekaram. «Ja vielmi sumavała pa našych stravach, kali pačała žyć u Kanzasie. Mnie nie padabalisia amierykanskija tarty — prosta sałodkaja masa. Tamu ja pačała hatavać, piekčy. A kali ŭ nas z Połam naradziŭsia syn, ja całkam pieraviała siamju na chatniuju ježu».
Ułasny biznes Natalla adkryła ŭ 2011m: «U toj hod Poł zhubiŭ pracu, i my pierajechali ŭ Misury. U maleńkim horadzie było ciažka ŭładkavacca. Moj muž taksama dobra hatuje, i my vyrašyli raspačać ułasnuju spravu.
My znajšli stary dom ź cikavaj architekturaj, dzie i adkryli kaviarniu. Heta było napiaredadni Kaladaŭ, i mnohija prychodzili da nas i prasilisia arhanizavać viečarynu z paŭnavartasnym absłuhoŭvańniem. Tak kaviarnia stała restaranam».
Ciapier «Biełaruski piekar» karystajecca papularnaściu siarod miascovaha nasielnictva i zajmaje vysokuju pazicyju ŭ rejtynhu restaranaŭ štata.
Natalla kaža, što nijakaha sakretu niama: u restaranie jana hatuje taksama, jak i doma. Sprava ŭ tym, što amierykancy zusim advykli ad chatniaj ježy: «Navat u mnohich amierykanskich restaranach ježa čaściakom hatujecca z paŭfabrykataŭ. U nas usio hatujecca sa śviežych praduktaŭ».
Choć mieniu restarana zbolšaha składajuć tradycyjnyja amierykanskija stravy, Natalla hatuje i biełaruskuju ježu: «Najbolš papularny boršč. Amierykancy zavuć jaho «vadkaj sałataj». Uzimku ja hatuju haračy sup, a ŭletku — chaładnik. Ludzi kaštujuć, im padabajecca, i jany sprabujuć pryhatavać boršč doma pa receptach ź interneta. Adnak u ich niama dośviedu pryhatavańnia burakoŭ, tamu boršč nie ŭdajecca, a ludzi stanoviacca stałymi klijentami restarana».
«Asnoŭnymi naviedvalnikami «Biełaruskaha piekara» źjaŭlajucca piensijaniery, — kaža Natalla.
— Raduje, što apošnim časam prychodzić bolš moładzi. Adnak byvaje, što zavitvajuć biełarusy, jakija admysłova pryjazdžajuć u restaran z «rodnaj» nazvaj. Jany aburajucca, što nie znachodziać u mieniu tradycyjnaj biełaruskaj kuchni. Takim klijentam ja kažu: «Zamaŭlajcie, što chočacie, — ja pryhatuju».
