Ciomnaskury hramadzianin, vierahodna, žychar adnoj z afrykanskich krain, praciahły čas znachodzicca ŭ Centry izalacyi pravaparušalnikaŭ na Akreścina. Pry hetym jon nie vałodaje ni ruskaj, ni anhlijskaj movami, što całkam pazbaŭlaje jaho kamunikatyŭnych suviaziaŭ z administracyjaj izalatara.

Pravaabaroncam pra heta raspavioŭ Maksim Viniarski, jaki dniami vyzvaliŭsia z-pad administracyjnaha aryštu i prabyŭ u adnoj kamiery z zatrymanym 12 dzion.

Raspaviadaje Maksim Viniarski: «Z druhoha dnia majho znachodžańnia ŭ CIPie, kali 23 krasavika mianie pieraviali ŭ kamieru-dvojku №37 (na 2 čałavieki), tut siadzieŭ ciomnaskury čałaviek, imia jahonaje Patryk. Proźvišča było ciažka zrazumieć, ale pačynajecca jano na litaru M. Jon zusim nie razmaŭlaje ni na ruskaj movie, ni pa-anhlijsku.

Supracoŭniki Centra, źviartajučysia da jaho, niekalki razoŭ pramaŭlali słova «Konha», adnak nieviadoma, ci heta kraina jahonaha žycharstva».

Sa słovaŭ Viniarskaha taksama viadoma, što Patryk admaŭlajecca ad viačery, a na abied biare tolki pieršuju stravu. Vierahodna, zatrymany čakaje departacyi na radzimu ci niejkich daviedak ad ambasady, adnak, pa-pieršaje, heta davoli doŭhi praces, a pa-druhoje, chutčej za ŭsio, ambasady jahonaj krainy ŭ Biełarusi nie isnuje.

Praciahvaje Maksim Viniarski: «2 traŭnia Patryk admoviŭsia zachodzić u kamieru paśla ranišniaj pavierki. Jaho pasprabavali zavieści z prymianieńniem fizičnaj siły, jon pratestavaŭ i paŭtaraŭ słova «ambasada». Paśla niezrazumiełaj słoŭnaj pierapałki, supracoŭniki milicyi pavalili jaho ŭ kalidory na padłohu, a mianie zapchnuli ŭ kamieru, kab nie zaminaŭ, i začynili dźviery, Dalejšyja padziei ja naziraŭ praz ščylinu u vakiency «karmuški». Patryku zakrucili ruki za śpinu i načapili kajdanki. Zatym nohi zzadu padsunuli pad ruki, atrymałasia «łastaŭka». Patryk, prycisnuty da padłohi, pry hetym kryčaŭ «Rasista!». Praź niekatory čas jany adyjšli, i Patryk staŭ pavoli vyzvalać nohi. Tady jaho znoŭ skrucili i da kanca śniadanka jon lažaŭ na kalidory. Zatym jaho dosyć enierhična ŭkinuli ŭ kamieru».

Hety vypadak taksama zaśviedčyŭ i Illa Dabratvor, jaki ŭ toj čas adbyvaŭ aryšt.

«Nivodnaja źmiena achoŭnikaŭ u Centry izalacyi pravaparušalnikaŭ z zatrymanym narmalna havaryć nie mahła, dy i nie mieła takoha namieru: lažyć sabie ŭ kamiery, nu i niachaj lažyć dalej. Z hetaj pryčyny jon nie moža patrapić u duš, na prahułku, pakolki nie viedaje, što ad jaho patrabujuć. Ja sprabavaŭ havaryć ź im na anhlijskaj movie, adnak biespaśpiachova. Kolki času jon tam znachodzicca – nieviadoma».

Maksim Viniarski taksama paviedamiŭ, što padčas prahułak inšyja aryštavanyja kazali pra toje, što

ŭ CIPie siadzić niejki spartsmien-zamiežnik, jaki nibyta parušyŭ mihracyjnaje zakanadaŭstva i ź jakoha vymahajuć hrošy, pakolki, maŭlaŭ, u Biełarusi niama ambasady, jakaja b jamu dapamahła.

Tamu ź im sprabuć damovicca šlacham šantažu: ale ci dakładana heta kažuć pra Patryka – Viniarski nie viedaje.

Pravaabaronca Valancin Stefanovič, kamientujučy hetuju absurdnuju situacyju, adznačaje nastupnaje:

«Heta nie pieršaja padobnaja situacyja, ź jakoj sutykajucca biełaruskija pravaabaroncy. Historyja, pra jakuju raspavioŭ Viniarski, nabyvaje asablivuju aktualnaść u śviatle majučych adbycca pieramovaŭ MZS Biełarusi i Jeŭrakamisii pa pahadnieńni ab spraščeńni vizavaha režymu i readmisii pamiž ES i našaj krainaj.

Readmisija aznačaje, što z terytoryi krainaŭ ES buduć pieranakiroŭvać nielehalnych emihrantaŭ, jakija patrapili tudy praz terytoryju Biełarusi dla arhanizacyi ichniaj dalejšaj departacyi na radzimu.

U suviazi z hetym padajecca važnym pytańnie stvareńnia admysłovych centraŭ dla ŭtrymańnia takoj katehoryi hramadzian, jakija b adpaviadali mižnarodnym standartam i nie pryvodzili da žorstkaha i biesčałaviečnaha abychodžańnia z hetymi ludźmi, jakija ŭ bolšaści vypadkaŭ nie ździajśniali nijakich złačynstvaŭ u Biełarusi. Važnym źjaŭlajecca i pytańni padrychtoŭki piersanału, jaki b vałodaŭ zamiežnymi movami i moh rastłumačyć padlahajučym departacyi zamiežnym hramadzianam adpaviednyja pravavyja pracedury, ich pravy i abaviazki».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?