Pavodle padlikaŭ Biełstata, u krasaviku 2014 hoda siaredni zarobak u krainie skłaŭ $590. Šmat, ale heta nie rekord. Minułym letam jon pierasiahaŭ $620.

Tady «Naša Niva» paraŭnoŭvała (№32 ad 28 žniŭnia 2013) biełaruskija zarobki z hrašyma, jaki atrymlivajuć u susiednich krainach. Nakolki źmianiłasia situacyja ciapier?

My znoŭ sabrali samyja śviežyja źviestki ab zarobkach u 20 krainach Uschodniaj i Centralnaj Jeŭropy — ad Rasii da Słavienii. Pieradusim, heta postsacyjalistyčnyja krainy, jakija ŭ pačatku 1990­-ch byli ź Biełaruśsiu na susiednich prystupkach.

U krainach Zachodniaj i Paŭnočnaj Jeŭropy atrymlivajuć našmat bolšyja hrošy. U kvitniejučaj Šviejcaryi siaredni čysty zarobak pieravyšaje $5 tysiač!

Bruta i nieta

Biełaruskaja statystyka zaŭždy nazyvaje «brudnyja» zarobki, da spłaty padatkaŭ. U našaj krainie rabotnik spłačvaje padachodny padatak (12%) i pakidaje 1% zarobku ŭ fondzie sacyjalnaha zabieśpiačeńnia. I ŭ kišeni zastajecca $513. Astatniaja padatkovaja nahruzka ŭskładajecca na pracadaŭcu. Pa takim samym pryncypie dziejničajuć Rasija, Małdova i Ukraina.

U mnohich jeŭrapiejskich krainach abranaja inšaja schiema: jak minimum piatuju častku zarobku davodzicca addavać u vyhladzie padatkaŭ. Naprykład, žychary Danii viartajuć kala 48% svajho dachodu, niatanna abychodzicca i šviedskaja sacyjalnaja madel — 44,3%. Zrešty, na rukach u ich usio adno zastajecca $3­4 tysiačy na žyćcio.

Šparkija statystyki

Biełaruskaja statystyka ledź nie samaja chutkaja na kantyniencie. U našaj krainie ŭžo apublikavany pamier zarobkaŭ za krasavik, u toj čas jak čechi, słavaki i litoŭcy tolki razabralisia ź minułym hodam. Tamu i ŭnifikavać dadzienyja, aryjentujučysia pa «adstajučych», składana. Tamu ŭ tablicu źviedzienyja ličby za rozny čas. Adnak u bolšaści krain zarobki davoli stabilnyja, jany nie skačuć rezka štomiesiac.

Uzor — Słavienija

U mnohich krainach sa śpisa chodzić jeŭra, u inšych — nacyjanalnaja valuta pryviazanaja da ahulnakantynientalnaj. Adnak my dla zručnaści pradublavali ličby i ŭ jeŭra, i ŭ dalarach.

Jak i hod tamu, najbolš bahataj postsacyjalistyčnaj krainaj Jeŭropy źjaŭlajecca Słavienija, jakaja padychodzić da aryjencira ŭ 1000 jeŭra čystymi. Kali raniej tolki ŭ hetaj krainie zarablali bolš za $1000, to ciapier psichałahičnuju miažu pieraadoleli jašče i estoncy, i čechi.

Estonija ž tryvała zajmaje pieršaje miesca siarod krain byłoha SSSR.

Rasija padaje, astatnija rastuć

Letaś Rasija i Polša išli naha ŭ nahu. Palaki pabahacieli jašče na $100, a voś rasiejcy… Devalvacyja rubla pryviała da taho, što siaredni zarobak va ŭschodniaha susieda pamienieŭ z $850 da $780. U vyniku napierad vyjšła jašče i Słavakija.

Nastupnyja źmieny ŭ rejtynhu datyčacca mižsabojčyka Litvy i Łatvii, a taksama Vienhryi. U prybałtyjskich krainach čysty siaredni zarobak narešcie pieravysiŭ $700, adnak dla Łatvii ŭkazanaja ŭ tablicy suma — zavialikaja. Jana atrymałasia ŭ śniežni za košt navahodnich premij i vidavočna «vybivajecca» siarod susiednich miesiacaŭ.

U papiaredniaj publikacyi «Naša Niva» adznačała, što biełaruskaj ekanomicy nie chapaje ŭsiaho $100, kab dahnać Litvu. Adnak łukašenkaŭskaja madel tady pracavała na miažy svaich mahčymaściaŭ. Jak vynik, roźnica ź litoŭskimi zarobkami ciapier dasiahnuła $190.

Biełarusaŭ tym časam abahnali rumyny i sierby. A baśnijcy i čarnahorcy adarvalisia jašče dalej.

Aŭtsajdary

Nižejšy za biełstataŭski zarobak u rejtynhu majuć piać krain. Ekanomiki Makiedonii i Bałharyi — najbiadniejšaj krainy Jeŭrasajuza — praciahvajuć svoj pavolny rost. Čaho nie skažaš pra Ałbaniju, u jakoj pa vynikach 2013 hoda zafiksavali $390 proci $290 u 2012 hodzie. Ci daviarać dadzienym miascovych statystykaŭ?

Naprykancy śpisa Ukraina i Małdova. Devalvacyja hryŭni apuściła zarobki ŭ paŭdniovaha susieda z $335 da $280. Zhubili častku hrošaj i małdavanie. Jany pa­raniejšamu na apošnim miescy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?