12 900 hledačoŭ nazirali, jak biełaruski čempijon pieramahaŭ słavackaha. Heta byŭ rekord stadyjona. Pryparkavacca pierad hulnioj było prablemaj, ź Minska na Barysaŭ rušyŭ doŭhi karavan z aŭtamabilaŭ.

Pierad uvachodam u vip-zonu pilny milicyjant spyniŭ byłoha staršyniu Minskaha abłvykankama Barysa Baturu: «Mužčyna, kudy vy pajšli biez nadhladu?» Na tvary Batury adbiłasia ščyraje ździŭleńnie.

Paśla finalnaha śvistka stadyjon vyhuknuŭ ŭ paryvie ščaścia. «Barysaŭ-Arena» ŭ pieršy hod ekspłuatacyi adrazu prymie najmacniejšyja spabornictvy Jeŭropy.

A pačynałasia ŭsio ŭ Bracisłavie. U hulni tydniovaj daŭniny ŭ BATE było ŭsio dobra chviliny hetak da 80-j. Barysaŭcy minimalna vyjhravali, dziakujučy aŭtahołu Jabłonskaha. A potym na zamienu vyjšaŭ brytahałovy Robiert Vitek, vieteran słavackaha futboła zateraryzavaŭ našu abaronu. Vitek zabiŭ dvojčy. Praŭda, sudździ zaličyli adzin hoł, druhi byŭ z afsajda.

Ničyja 1:1 pakidała dobryja šancy, bo hoł na čužoj placoŭcy pry roŭnaści miačoŭ ličycca za dva.

«Słovan» u barysaŭskim matčy, skažam ščyra, byŭ nijaki. Nivodnaha momanta ŭ pieršym tajmie. I tolki adzin u druhim. Zatoje jaki! Čykaš i Harasita va ŭpor rasstrelvali Černika. Bramnik nie zdryhanuŭsia. Trybuny čuła stali skandziravać jaho proźvišča: «Čeeeeernik». Ad nianaviści da lubovi.

Nu, a BATE ŭ hety viečar byŭ na vyšyni. Jašče ŭ pieršym tajmie biełarusy mahli zdymać usie pytańni ab pieramožcy. Ale Radzivonaŭ trapiŭ u štanhu, a Filipienku krychu nie chapiła dakładnaści.

Adziny hoł byŭ na rachunku Michaiła Hardziejčuka (na fota), jaki ŭdała praskočyŭ pamiž dvuma abaroncami. Pierad hetym vydatny pas na jaho addaŭ Vital Radzivonaŭ.

Na 78-j chvilinie hviniejec Suma zasłužyŭ čyrvonuju kartku. Zasłužyŭ pa spravie, parušyŭšy praviły ŭ centry pola. «Słovan», jaki kroŭ z nosu musiŭ zabivać, adkryvaŭsia ŭsio bolej i bolej. Za što atrymlivaŭ kontrataku za kontratakaj.

Kryviec zabiŭ druhi miač. Paśla hetaha słavaki razvalilisia, jany sami nie vieryli ŭ svaju pieramohu. Radzivonaŭ zrabiŭ lik u hulni bujnym — 3:0.

Chacia BATE moh rabić ličby na tabło jašče pryhažejšymi i bujniejšymi. Barysaŭcy ŭ Lizie čempijonaŭ! Čakajem praciahu ad «Dynama» i «Šachciora».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?