Viarchoŭny sud Biełarusi apraŭdaŭ raniej asudžanych za bujny chabar hienieralnaha dyrektara AAT «Biellehpramprajekt» i dyrektara UKB administracyi Leninskaha rajona Minska. 

«Razhledzieŭšy spravu i abmierkavaŭšy kasacyjnuju i pryvatnuju skarhi, sudovaja kalehija Viarchoŭnaha suda vyznačyła: pryhavor sudovaj kalehii Minskaha haradskoha suda ad 1 krasavika 2014 hoda ŭ dačynieńni da Siamiona Mikałajeviča Iokšy i Uładzimira Michajłaviča Čyhryna admianić i vytvorčaść pa spravie spynić za niedakazanaściu ich udziełu va ŭčynieńni złačynstva. Mieru strymańnia — źmiaščeńnie pad vartu — admianić i z-pad varty ich vyzvalić», — abviaściŭ 28 žniŭnia staršynia pasiadžeńnia kalehii sudździa Viarchoŭnaha suda Uładzimir Davydaŭ. 

54-hadovy Iokša i 70-hadovy Čyhryn z maja 2006 hoda byli fihurantami spravy ab chabary ŭ paŭmiljona dołaraŭ. Jany byli zatrymanyja ŭ mai 2006 hoda: na toj momant hiendyrektar AAT «Biellehpramprajekt» Siamion Iokša i dyrektar KUP «UKB administracyi Leninskaha rajona Minska» Uładzimir Čyhryn, a taksama namieśnik dyrektara pa budaŭnictvie AAT «Biellehpramprajekt» Mikałaj Tałkač. Apošni pamior u SIZA ad zachvorvańnia na rak. 

Pavodle viersii śledstva, jakoje pravodziła Hienieralnaja prakuratura, Iokša abvinavačvaŭsia ŭ tym, što pierakonvaŭ pradstaŭnikoŭ rasijskaj inviestycyjnaj kampanii «Arłoŭskija mietały» ŭ nieabchodnaści pieradačy chabaru ŭ 500 tysiač dołaraŭ «słužbovym asobam vykanaŭčych orhanaŭ ułady za vyjhryš tendara, jaki pravodzicca siarod budaŭničych kampanij, pa prajektavańni i budaŭnictvie žyłych damoŭ u Minsku». Rasijanie tendar vyjhrali, i hrošy ad ich Iokša atrymaŭ kala kafe «Hrunvald», dzie i byŭ zatrymany. Čyhryn abvinavačvaŭsia «ŭ zamachu na atrymańnie chabaru za akazańnie rasijskim inviestaram dapamohi ŭ vyjhryšy tendara na zabudovu žyłoha kompleksu i va złoŭžyvańni ŭ suviazi z hetym słužbovymi paŭnamoctvami». 

U 2007 hodzie pryhavoram suda Frunzienskaha rajona Minska Iokša byŭ asudžany da 11 hadoŭ pazbaŭleńnia voli z kanfiskacyjaj majomaści, Čyhryn — da 10 hadoŭ pazbaŭleńnia voli z kanfiskacyjaj majomaści. U krasaviku 2008 hoda na sajcie Hienprakuratury źjaviłasia paviedamleńnie, što pryhavor nabyŭ moc. 

Pryhavor Frunzienskaha rajsuda byŭ admienieny sudom vyšejšaj instancyi ŭ 2011 hodzie. Advakat Siamiona Iokšy Ludmiła Pałačkina źviarnuła ŭvahu, što tolki praź piać hadoŭ Minharsud zaŭvažyŭ: apieratyŭna-vyšukovyja mierapryjemstvy pravodzili biez sankcyi prakuratury niezakonna. Na hetaj padstavie Iokša i Čyhryn byli apraŭdany i vyzvaleny ź miescaŭ pazbaŭleńnia voli. 1 krasavika hetaha hoda Minharsud vynies u dačynieńni da Iokšy i Čyhryna druhi abvinavaŭčy pryhavor — 10 i 9 hadoŭ pazbaŭleńnia voli adpaviedna. Paśla trochhadovaha znachodžańnia na voli jany znoŭ adpravilisia ŭ SIZA. 

Apošniaja pastanova vyšejšaj sudovaj instancyi (ad 28 žniŭnia 2014 hoda) na siońniašni dzień poŭnaściu reabilituje Iokšu i Čyhryna. Jak stała viadoma, kampanija «Arłoŭskija mietały» sapraŭdy isnuje, ale jana nie źbirałasia vystupać u Biełarusi inviestaram i pradstaŭnikoŭ u Minsku nie mieła. Pad ich vyhladam, chutčej za ŭsio, dziejničali realnyja supracoŭniki milicyi, jakich zabiaśpiečyli lehiendaj biźniesmienaŭ i sapraŭdnymi biełaruskimi pašpartami z čužymi danymi. Takim čynam, usie dakumienty pa nibyta vyjhranym tendary na budaŭnictva žyłych damoŭ byli falšyvymi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?