Niezvyčajnuju historyju biaźmiežnaha davieru i čałaviečaj podłaści raskazała televiadučaja Valaryna Kustava.
Jurasia S. viedajuć mnohija biełarusy asabista i virtualna. U Minsku jon byŭ aktyvistam «Moładzi BNF», siadzieŭ na sutkach na Akreścina. U chłopca vydatnyja zdolnaści da zamiežnych movaŭ. Niekalki hadoŭ tamu jon źjechaŭ u emihracyju ŭ Šviecyju.
Tam Juraś nie zhubiŭsia, zastaŭsia blizkim da palityki. U jahonym prafajle napisana, što pracavaŭ u ofisie šviedskaj kansiervatyŭnaj partyi Maderaty, jakaja ciapier pry ŭładzie ŭ hetaj skandynaŭskaj krainie, pamočnikam deputata. Nie tak daŭno Juraś źmianiŭ miesca žycharstva na Łondan.
Tam i pačalisia pryhody. Paetka Valaryna Kustava kaža, što naprykancy červienia Juraś źviarnuŭsia da jaje z prośbaj. Prasiŭ jon źniać hatel, bo trapiŭ u nialohkuju žyćciovuju situacyju.
Valaryna viedała chłopca tolki sa stanoŭčaha boku. Kali jaje samu abrabavali ŭ Stakholmie, to mienavita Juraś pryjšoŭ na dapamohu.
Adnak prosta źniać hatel akazałasia mała. Małady čałaviek kazaŭ, što jaho nie puskajuć u haścinicu, brania zryvajecca i h.d. I Valaryna praciahvała zdymać hateli, choć hrošy z kartki praciahvali «tajać».
«Dalej, kali maje hrošy skončylisia ŭ nul, jon paprasiŭ, kab ja pazyčyła ŭ siabroŭ — i zabroniła znoŭ». Spačatku spn. Kustava admoviłasia, ale jon uhavaryŭ, i ŭ vyniku jana pazyčyła jašče hrošaj na patrebu Jurasia. Ale hetaha akazałasia mała! Chłopiec paprasiŭ pašpartnyja dadzienyja Valaryny i pinkod ad kartki, maŭlaŭ, biez hetaha jaho nie puskajuć u hateli. Straty paetki Valaryny skłali amal $1500.
U vyniku S. paprasiŭ znajści čałavieka ŭ Łondanie, jaki moh by dapamahčy jamu «ŭ takoj nialohkaj žyćciovaj situacyi». Valaryna paraiła miedyjaekśpierta Alaksieja Lavončyka, jaki pazyčyŭ Jurasiu hrošaj, a taksama puściŭ chłopca da siabie ŭ chatu pažyć.
Kali pryjšoŭ čas addavać pazyki, to chłopiec prosta źnik, nie adkazvajučy na telefanavańni i paviedamleńni ŭ sacyjalnych sietkach. Alaksiej Lavončyk kaža, što ŭ jaho spadar S. skraŭ z doma hrošaj na ahulnuju sumu prykładna $3000. Vyhrab navat drobnyja ŭkrainskija hryŭni — usio, što zmoh znajści.
«Jon pryjšoŭ, prarydaŭsia. Ničoha nie admaŭlaŭ. Skazaŭ, kali dy kolki skraŭ. Ja prymusiŭ jaho skazać dakładna, kali jon addaść hrošy Valarynie i mnie. Jon sam nazvaŭ daty». Ale ŭ hetyja dni Juraś ničoha nie addaŭ. «Stała vidavočna, što Juraś nas dynamić, chłusić, nie źbirajecca viartać hrošy», — kaža Lavončyk.
Paśla taho, jak historyja stała publičnaj, chłopiec iznoŭ źjaviŭsia na suviazi. Jon paabiacaŭ, što ciaham dnia addaść usie pazyki, tolki ŭmalaŭ vydalić dopis z apisańniem hetaj historyi u Fejsbuku.
Alaksiej i Valaryna znoŭ davierylisia, ale marna, hrošaj jany tak i nie pabačyli. Dzie ciapier sam Juraś, nichto nie viedaje. Mahčyma, jon viarnuŭsia nazad z Łondana ŭ Stakholm. Achviary majuć namier źviarnucca ŭ palicyju. Praŭda, pazyki paabiacała addać adna dobraja znajomaja Jurasia. U takim vypadku sprava skončycca paluboŭna.
