Dla viadzieńnia infarmacyjnaj vajny rasijskija ŭłady padklučyli vielizarnyja resursy. Tolki za hety hod dziasiatki aŭtaraŭ vydali svaje psieŭdahistaryčnyja i psieŭdapalitałahičnyja pracy, što apisvajuć žachi «banderaŭščyny» i śćviardžajuć, što Ukraina zabłukała i biez Rasii joj — nikudy.
U dadatak da novych knih pieravydajucca i staryja, tema jakich pierasiakajecca z historyjaj Ukrainy ci Kryma.
Naprykład, vydaviectva «Eksmo» raspačało sieryju «Krym», u jakoj pieravydała «Sievastopalskija raskazy» Tałstoha, «Padziei ŭ Sievastopali» Kupryna, «Bieh» Bułhakava. Usie knihi vychodziać u novaj patryjatyčnaj vokładcy z Andrejeŭskim ściaham i Śviatym Jurjem na hierbie.
Adnak niekatoryja knihi napatkaŭ jašče bolš sumny los. Nadzvyčaj cikavaja i kniha Džona Armstranha «Istoki samostijnoho nacizma. K čiemu prišła Ukraina v XXI viekie» vydaviectva «Centrpalihraf». Na vokładcy źmieščanyja dva fotazdymki: ukrainskaha tryzubca na fonie hitleraŭskich svastyk uviersie i zdymak dvuch žaŭnieraŭ, jakija kudyści vałakuć biazzbrojnaha čałavieka ŭnizie.
Zahałovak i afarmleńnie vokładki niasuć vielmi mocny antyŭkrainski pasył. Adnak nie ŭsio tak prosta. Bo pad vokładkaj znachodzicca kniha amierykanskaha ŭkrainaznaŭcy i zasłužanaha prafiesara ŭniviersiteta Viskonsin-Medysan Džona Alaksandra Armstranha — viadomaha daśledčyka nacyjanalnych ruchaŭ va Uschodniaj Jeŭropie.
Aryhinalnaja nazva knihi — Ukrainian Nationalism 1939–1945 (dasłoŭna «Ukrainski nacyjanalizm u 1939—1945 hh.»).
Kniha była ŭpieršyniu vydadzienaja ŭ 1955 hodzie i pieražyła try vydańni. Knihu Džona Armstranha varta pračytać zacikaŭlenym u dadzienaj tematycy, jaje chvalać za bahaty palavy materyjał: Armstranh svabodna vałodaŭ ukrainskaju i rasijskaj movami i atrymlivaŭ infarmacyju ad niepasrednych udzielnikaŭ i vidavočcaŭ padziej.
Cikava, što «Centrpalihraf» užo vydavaŭ knihu Armstranha pad nazvaj «Ukrainskij nacionalizm. Fakty i isśledovanija».
Ale «nacyjanalizm» ciaham šaści hadoŭ pieratvaryŭsia ŭ «samostijnyj nacizm».
Zastajecca tolki zdahadvacca, što dadali ci prybrali z samoha tekstu knihi vydaŭcy, jakija tak metanakiravana skazili nazvu i vokładku daśledavańnia. Na žal, sam Armstranh pamior u 2010 hodzie i ŭžo nie daviedajecca, pad jakim zahałoŭkam jaho praca sustreła čarhovaje pieravydańnie.
My patelefanavali ŭ vydaviectva i zapytalisia, čamu jany tak źmianili nazvu? I ci ŭzhodniena heta z naščadkami historyka? Paśla doŭhaha pramarudžvańnia nam adkazali, što supracoŭnik, adkazny za vychad dadzienaj knihi, bolš u vydaviectvie nie pracuje, a bolš nichto infarmacyju dać nie moža.