19-hadovaja Vika na praciahu niekalkich miesiacaŭ padmanvała svajho chłopca Alaksieja, śćviardžajučy, što ciažarnaja ad jaho i navat što naradziła dzicia.
Trahična skončyłasia viaskovaja «Santa-Barbara» ŭ Rečyckim rajonie. 19-hadovaja dziaŭčyna na praciahu niekalkich miesiacaŭ chłusiła svajmu siabru, što ciažarnaja ad jaho i navat naradziła dzicia. Jon ža vyrašyŭ jaje zabić praz heta. Znarok ci vypadkova, žudasnaje złačynstva adbyłosia na Dzień usich zakachanych, 14 lutaha. U vieraśni pačaŭsia sudovy razhlad kryminalnaj spravy.
Zhodna z abvinavačvańniem, 14 lutaha kala 21.30 la vioski Pieravałoka Rečyckaha rajona ziamlak paeta Sysa, žychar vioski Haroškaŭ 1994 hoda naradžeńnia, ździejśniŭ zabojstva 19-hadovaj dziaŭčyny, žycharki vioski Sałtanova.
Dapamahaŭ mahčymamu zabojcu (stupień jaho viny dakaža sud) jaho siabra, žychar vioski Bronnaje 1993 hoda naradžeńnia.
Alaksiej, były chłopiec Viki, zabiŭ jaje, niekalki razoŭ stuknuŭšy pałkaj pa hałavie. Kali dziaŭčyna pamierła, da jaje cieła złačynca pryviazaŭ miašok z kamianiami i ŭtapiŭ ŭ sažałcy.
Sud sprabuje da drabnic vyśvietlić abstaviny taho Dnia ŭsich zakachanych, jaki staŭ dla 19-hadovaj Viki apošnim.
U sudovaj zale šmat ludziej. Svajaki zabitaj i imaviernych zabojcaŭ siadajuć dalej adny ad adnych. Ale i tyja, i druhija časta nie mohuć strymać śloz.
Chłopcy ž na łavie padsudnych trymajucca spakojna, upeŭniena i navat badziora. Viačasłaŭ časam viesialicca, z hatoŭnaściu adkazvaje na pytańni sudździ. Alaksiej pakazvaje svajakam ścisnuty i ŭźniaty kułak, strymana ŭśmichajecca.
Pakazańni, jakija davali abvinavačanyja na śledstvie, miescami adroźnivajucca ad tych, jakija jany ahučvajuć u zale suda. Ale heta tyčycca nie asnoŭnych momantaŭ złačynstva. Pa viersii Alaksieja, ź Vikaj jon raniej vučyŭsia ŭ NVK (navučalny-vytvorčy kambinat), ale nie siabravaŭ. Niejak u 2013 hodzie jany vypadkova sustrelisia ŭ Rečycy na vulicy, zaviazałasia blizkaje znajomstva, maładyja ludzi pačali sustrakacca. Praz dva miesiacy paśla znajomstva dziaŭčyna «abradavała» Alaksieja viestkaj pra toje, što ciažarnaja. Jon ža nie chacieŭ mieć ź Vikaj surjoznych adnosinaŭ i tamu prapanavaŭ zrabić abort. Dziaŭčyna admoviłasia.
Potym vyśvietliłasia, što pra ciažarnaść dziaŭčyna schłusiła. Takim čynam jana sprabavała ŭtrymać Alaksieja, bo zaŭvažyła, što jon źmianiŭ svoj status «Ukantakcie» — zajmieŭ inšuju siabroŭku.
Heta i vymusiła Viku prydumać viersiju pra ciažarnaść. Dziaŭčyna pačała taksama pahražać siabruku, što ŭ vypadku, kali jon jaje kinie, jana pojdzie da babak-šaptuch i «naviadzie na jaho psuju». Pa słovach druhoha abvinavačvanaha, Viačasłava, jaho siabar Alaksiej bajaŭsia pahroz pra psuju, tamu nie kidaŭ dziaŭčynu, pryjazdžaŭ da jaje pieryjadyčna. Alaksiej taksama ŭ svaich pakazańniach na papiarednim śledstvie pryznavaŭsia, što bajaŭsia pahroz Viki, što taja pry dapamozie viadźmarak «adbiare ŭ mianie zdaroŭje». Tady, vosieńniu 2013 hoda, u chłapca naradziłasia takaja dumka, jakuju jon ahučyŭ u pakazańniach: «Kali ŭ Viki budzie vykidyš, heta pazbavić mianie prablem, jana bolš nie budzie pałochać mianie šaptuchami i nahniatać abstanoŭku».
Jon paprasiŭ svajho siabruka Viačasłava, kab toj padpilnavaŭ dziaŭčynu i pabiŭ jaje nahami ŭ žyvot. Chłopiec spadziavaŭsia, što paśla hetaha ŭ dziaŭčyny zdarycca vykidyš.
Sudździa ŭdakładniaje: «Adkul vy takoje ŭziali, što, kali pabić nahami ŭ žyvot, — budzie vykidyš? Vy čytali admysłovuju litaraturu?» Alaksiej adkazvaje: «Bačyŭ takoje pa televizary, u sieryjale. Niechta šturchnuŭ dziaŭčynu, jana stuknułasia — i ŭ jaje zdaryŭsia vykidyš».
Darečy, vinavacili «va ŭsim» televizar, filmy i sieryjały i svajaki zabitaj dziaŭčyny, kali razmaŭlali paśla sudovaha pasiedžańnia. «Heta ž dzieci, im ža pa 20 hadoŭ, prablemy nie ŭmiejuć vyrašać, nahladzielisia tych sieryjałaŭ dy voś tak atrymałasia», — razvažali viaskoŭcy.
U toj vosieński viečar Viačasłaŭ pilnavaŭ dziaŭčynu ŭ kustach la jaje doma. Alaksiej ža, damoviŭšysia ź im, padvioz Viku dachaty i abiacaŭ patelefanavać, kali achviara budzie na miescy.
Vika vyjšła z aŭtamabila Alaksieja, toj patelefanavaŭ Viačasłavu, chłopiec naciahnuŭ na hałavu pakunak (kab jana jaho nie paznała) i kinuŭsia na achviaru sa śpiny. Ad mocnaha ŭdaru dziaŭčyna zvaliłasia na ziamlu i zakryčała. Spracavała sihnalizacyja na pryparkavanym pobač aŭtamabili, złačynca spałochaŭsia i źbieh. Paźniej jon daŭ spravazdaču siabru, što ŭsio-taki pabiŭ, jak toj i prasiŭ, Viku nahami pa žyvacie.
«Čamu vy zhadzilisia na prośbu siabra pabić Viku? Vy razumieli, jakija mohuć być nastupstvy dla dziaŭčyny?» — sudździa. «Ja nie viedaju. Ciažka skazać», — miamlić Viačasłaŭ.
Tym časam Vika paskardziłasia na telefonie Alaksieju, što niechta napaŭ na jaje kala padjezda. Jana praciahvała nastojvać, što ciažarnaja. Praź jašče niejki čas dziaŭčyna paviedamiła, što jana naradziła raniej terminu dzicia, i chłopčyk znachodzicca «pad kaŭpakom» u špitali ŭ Homieli.
Alaksiej śćviardžaŭ na sudzie, što nieadnarazova prasiŭ Viku pakazać «syna», taja ž adniekvałasia, tłumačyła, što niemaŭla to ŭ špitali, to ŭ babuli. Miž tym prasiła, pa słovach chłopca, u jaho hrošy na «pampiersy». Dziaŭčyna kazała, što syna nazvała Maratam.
U lutym, vidavočna, Alaksiej vyrašyŭ zabić Viku. Na sudzie jon davodzić, što nie płanavaŭ zabojstva i heta vyjšła vypadkova, u sprečcy.
«My jechali na dyskateku ŭ viosku Pieravałoka. Pa darozie pačali svarycca, vyjšli z aŭtamabila, kiravaŭ jakim Viačasłaŭ, svarylisia, jana mianie abražała, šturchała kułakom u hrudzi, łajałasia matam, ja nie vytrymaŭ, schapiŭ niejkuju pałku i stuknuŭ jaje niekalki razoŭ pa hałavie», — raspaviadaŭ małady čałaviek.
Dokazy havorać pra inšaje. U bahažniku aŭtamabila byŭ užo padrychtavany miašok z cahlinami, drot, humavyja boty. Miašok z cahlinami pry dapamozie drotu zabojca pryviazaŭ da cieła achviary i skinuŭ jaho ŭ techničny vadajom. Boty ž byli patrebnyja, kab dabracca pa voziery da pałonki.
Viačasłaŭ dakazvaŭ na sudzie, što ničoha nie viedaŭ. Pra toje, adkul u bahažniku źjavilisia drot i miašok z kamianiami, havoryć, što pakłaŭ ich Alaksiej pierad pajezdkaj, patłumačyŭšy, što choča «zapałochać Viku». Jakim mienavita sposabam — nie ŭdakładniaŭ.
Pa słovach Viačasłava, jon nie dapamahaŭ zabivać dziaŭčynu, bačyŭ, jak Alaksiej jaje stuknuŭ pałkaj. Potym dapamoh daciahnuć cieła da štučnaha voziera.
«Čamu vy nie dapamahli Vicy, nie abaranili jaje, kali bačyli, jak Alaksiej jaje bje pałkaj pa hałavie?» — pytajecca sudździa.
«Ja byŭ u šokavym stanie. Ja bajaŭsia Alaksieja», — apraŭdvajecca chaŭruśnik.
Paśla zabojstva chłopcy jeduć u Rečycu, iduć pić u bar, potym nabyvajuć «vino, šakaładku i preziervatyvy» i baviać viečar i častku nočy ŭ kampanii dziaŭčat.
Na pasiadžeńnie nie źjavilisia śviedki, tamu sud vynies rašeńnie dastavić ich prymusova.
Nahadajem, heta nie adzinaje žorstkaje zabojstva ŭ Rečyckim rajonie. Tak, 29 žniŭnia 2013 hoda była žorstka zabitaja i źniaviečanaja 19-hadovaja žycharka Rečycy Alesia. Jaje zabojca aryštavany, nieŭzabavie ŭ Homielskim abłasnym sudzie pačnucca słuchańni spravy. Zabojca i jaho achviara byli znajomyja, jany byli adnahodki. Jon pravodziŭ dziaŭčynu dachaty, a potym žorstka zabiŭ jaje.
Letam 2013 hoda kala vioski Voŭčaja Hara Rečyckaha rajona była zabitaja 23-hadovaja Lila, vypusknica Mazyrskaha pieduniviersiteta. Vyjaviłasia, što zabraŭ u jaje žyćcio były siabar i adnakurśnik. Dziaŭčyna admoviłasia praciahvać ź im stasunki. Pomsta jaho była strašnaj. Na sudzie małady čałaviek atrymaŭ za zabojstva 15 hadoŭ.
Paśla sudovaha pasiadžeńnia da maci zabitaj dziaŭčynki padychodzić maci Alaksieja. Dźvie žančyny pra niešta cicha razmaŭlajuć kala akna, abiedźvie horka płačuć.
Čuvać, što maci chłopca prosić prabačeńnia ad jaho imia. Sam jon pakul hetaha nie zrabiŭ.
