Znajści dla svajho dziciaci miesca ŭ biełaruskamoŭnym kłasie — składanaja zadača. Nie va ŭsich haradach i nie va ŭsich mikrarajonach Minska jany jość. Ale na hetym baćkoŭskija niahody nie zakančvajucca. Niama padručnikaŭ i dapamožnikaŭ na movie.

«U dadatak da školnaha naboru padručnikaŭ patrebnyja pracoŭnyja sšytki, atłasy, karty, — kaža Kryścina Vituška, maci Mirona, jaki chodzić u minskuju himnaziju №23. — Dyk voś, pa pradmiecie «Historyja» ŭ 5 kłasie ni sioleta, ni letaś nie rabiłasia dziaržaŭnaja zamova i nie vypuskalisia karty i atłasy pa-biełarusku. U biblijatecy himnazii jość atłasy minułych hadoŭ vydańnia, ale konturnyja karty — pradukt adnarazovaha vykarystańnia, i ich niama».

Za vypusk konturnych kart u Biełarusi adkazvaje «Biełkartahrafija». Pieralik pradukcyi na sajcie pradpryjemstva paćviardžaje skarhi baćkoŭ: pa-biełarusku vypuskajucca tolki konturnyja karty pa historyi Biełarusi i pradmiecie «Čałaviek i śviet» dla 4 kłasa. Dapamožniki pa suśvietnaj historyi, hieahrafii — tolki pa-rusku. Voś tabie i chvalonaje raŭnapraŭje.

Apošni nakład biełaruskamoŭnych atłasaŭ pa historyi staražytnych časoŭ «Biełkartahrafija» vydała ŭ 2012 hodzie nievialikim nakładam — 7365 asobnikaŭ. Zrazumieła, usim nie chopić. Pa-biełarusku ŭ krainie vučacca 16% školnikaŭ. Pakul jašče 16.

Za padručniki adkazvaje Nacyjanalny instytut adukacyi. Tam ža praličvajuć i nieabchodnyja nakłady rasijskamoŭnych i biełaruskamoŭnych vydańniaŭ.

«Atłas uvachodzić u kamplekt padručnikaŭ, jaki vydajecca ŭ škole, — patłumačyŭ načalnik adździeła pa zabieśpiačeńni srodkami adukacyi Andrej Chalimanovič. — Pa zakančeńni navučalnaha hoda jany viartajucca ŭ biblijateku. Ciažkaści mohuć uźnikać, kali dapamožnik daŭno nie pieravydavali i jon znasiŭsia. Ci kali vučań chodzić u ruskamoŭnuju škołu, a baćki chočuć jamu kuplać biełaruskamoŭnyja dapamožniki. Tady, moža, daviadziecca pabiehać, pašukać. Ale biełaruskamoŭnyja atłasy i karty musiać być. Ja ich asabista rychtavaŭ».

Adnak u prodažy ich niama! Va ŭpraŭleńni navučalnaha knihavydaviectva NIA patłumačyli, što vydańnie atłasaŭ finansujecca ź biudžetu i adbyvajecca pa dziaržzamovie.

A voś konturnyja karty vydajucca za srodki samoj «Biełkartahrafii» — hałoŭnuju rolu adyhryvaje popyt i zajaŭki ad handlovych sietak. Na žal, cierpić ad hetaha biełaruskamoŭny spažyviec: pradavać ruskamoŭnyja dapamožniki vyhadniej. A tyja biełaruskamoŭnyja… Abyducca!

Bazavyja biełaruskamoŭnyja padručniki vučniam vydajuć. Ale za miežami školnaj biblijateki pra harantavanuju roŭnaść movaŭ kazać nie davodzicca.

Sa śviečkaj nie znojdzieš nie tolki biełaruskamoŭnych konturnych kart, ale i viejeraŭ ź biełaruskimi litarami dla pieršakłaśnikaŭ, prostych sšytkaŭ z tablicaj množańnia, padručnikaŭ i sšytkaŭ pa anhlijskaj Magic Box dla małodšych kłasaŭ, dapamožnikaŭ pa redkich zamiežnych movach, jakija vyvučajucca ŭ himnazii, dapamožnikaŭ z dadatkovymi zadańniami, bieź jakich ciapier nie ŭjavić navučalny praces…

Niedachop biełaruskamoŭnaj mietadyčnaj litaratury piedahohi kampiensujuć ruskamoŭnaj. Maŭlaŭ, dzieci i tak zrazumiejuć.

Tak, naprykład, prakamientavała adsutnaść biełaruskamoŭnych konturnych kartaŭ dyrektarka biełaruskamoŭnaj 28-j himnazii Minska Nina Łazoŭskaja: «Dyk a što, na ruskaj movie nielha pračytać? Jany adroźnivajucca? Tam Zasłaŭje, tut Zasłaŭje. Jakaja roźnica?»

Tak, roźnica tolki ŭ tym, što takim čynam biełarusaŭ rusifikujuć. Paśladoŭna, sa škoły, u vialikim i małym. Pahladzieli b vy na reakcyju, kali b ruskim vydavali konturnyja karty pa-biełarusku. Voś takaja «roźnica».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?