Budaŭničyja raboty ŭ Kitajska-biełaruskim industryjalnym parku nieabchodna pačać užo ŭ 2014 hodzie. Ab hetym zajaviŭ siońnia premjer-ministr Biełarusi Michaił Miaśnikovič na sustrečy z pradstaŭnikami kitajskaj karparacyi inžynirynhu SAMSIE.
Premjer-ministr adznačyŭ, što praviedziena značnaja rabota: padrychtavany hienieralny płan, prajekt detalovaha płanavańnia pieršaj čarhi budaŭnictva, zakančvajecca prajektavańnie inžyniernaj i transpartnaj infrastruktury startavaj placoŭki. Michaił Miaśnikovič padkreśliŭ, što budaŭničyja raboty nieabchodna pačać užo ŭ hetym hodzie, paralelna z prajektavańniem.
Kitajskija partniory vysoka acanili ŭzrovień uzajemadziejańnia bakoŭ u realizacyi prajekta pa budaŭnictvie parka. Na dumku pradstaŭnikoŭ karparacyi, niahledziačy na ŭsie składanaści, prajekt budzie paśpiachova realizavany i stanie prykładam biełaruska-kitajskaha supracoŭnictva.
Na sustrečy padrabiazna abmierkavany pytańni finansavańnia budaŭnictva parka, aktyŭnaha pryciahnieńnia rezidentaŭ i stvareńnia na jaho placoŭcy vysokatechnałahičnych, inavacyjnych vytvorčaściej. Premjer-ministr vykazaŭ ahulnaje mierkavańnie ŭdzielnikaŭ sustrečy — prajekt pa budaŭnictvie industryjalnaha parka pavinien być realizavany jakasna i chutka.
Kitajskaja karparacyja inžynirynhu SAMSIE (China CAMC Engineering Co.) vystupaje suzasnavalnikam kampanii pa raźvićci Kitajska-biełaruskaha industryjalnaha parka. SAMSIE śpiecyjalizujecca na hienieralnym padradzie mižnarodnych prajektaŭ. Śfiera jaje dziejnaści davoli šyrokaja. Heta transparciroŭka, municypalnaje budaŭnictva, elektraenierhietyčnyja prajekty, prajekty ŭ naftachimičnaj halinie i inš. Kampanijaj realizavany dziasiatki bujnych mižnarodnych prajektaŭ pad kluč, a taksama prajektaŭ pa imparcie i eksparcie kamplektnaha abstalavańnia.
