Jehipiet prapanuje biełaruskim budaŭnikam pryniać udzieł va ŭźviadzieńni Sueckaha kanała. Pra heta paviedamiŭ siońnia žurnalistam ministr handlu Biełarusi Valancin Čakanaŭ.
«Jehipiecki bok vykazaŭ zacikaŭlenaść u tym, kab biełaruskija budaŭniki papracavali na budaŭnictvie Sueckaha kanała. Ciapier idzie jaho rekanstrukcyja, płanujecca realizacyja druhoj čarhi budaŭnictva kanała. U hetym płanie dla Biełarusi źjaŭlajucca vielmi cikavyja pierśpiektyvy nie tolki pa ŭźviadzieńniu samoha kanała, ale i stvareńniu tam infrastruktury», - adznačyŭ ministr.
Valancin Čakanaŭ taksama paviedamiŭ, što Biełaruś i Jehipiet damovilisia ab supracoŭnictvie ŭ śfiery pramysłovaści, sielskaj haspadarki, navuki, sportu, turyzmu, achovy zdaroŭja. Była dasiahnutaja damoŭlenaść ab stvareńni rabočaj hrupy pa arhanizacyi na terytoryi Jehipta sumiesnych pradpryjemstvaŭ pa vypusku biełaruskaj aŭtatranspartnaj techniki. Baki majuć namier sumiesna vyvučyć rynki Biełarusi i Jehipta dla stvareńnia sumiesnych pradpryjemstvaŭ u śfiery achovy zdaroŭja. Jość cikavyja prajekty i ŭ halinie sielskaj haspadarki, dla realizacyi jakich spatrebicca pastaŭka biełaruskaj sielhastechniki.
«My pryjšli da vysnovy, što dasiahnutyja pakazčyki, a heta kala $ 88 młn tavarazvarotu, vielmi nievialikaja ličba. U Biełarusi i Jehipta značna bolšy patencyjał. Imknieńnie palepšyć hety pakazčyk jość pa ŭsich napramkach», - paviedamiŭ ministr.
Siońnia ŭ Biełaruskaj handlova-pramysłovaj pałacie adbylisia sustrečy biźniesmienaŭ Biełarusi i Jehipta, na jakich byli dasiahnuty damoŭlenaści ab pastaŭkach pradukcyi.
Ministr handlu i pramysłovaści Jehipta Munir Fachry Abdel-Nur u svaju čarhu adznačyŭ, što jehipiecki bok prapanuje biełaruskim partnioram stvaryć na terytoryi Jehipta sumiesnyja pradpryjemstvy. Dla hetaha ŭ bližejšy čas budzie stvoranaja pracoŭnaja hrupa, jakaja praviadzie daśledavańni rynku nie tolki Jehipta, ale i bližejšych krain. «My praciahniem pa hetych napramkach pracu, kab palehčyć uzajemny handal, umacavać jaje i ŭzmacnić. My taksama damovilisia ź biełaruskimi kalehami, što z boku Biełarusi budzie akazana sadziejničańnie ŭ praviadzieńni pieramoŭnaha pracesu pamiž Jehiptam i krainami Mytnaha sajuza ab svabodnym handli», - paviedamiŭ kiraŭnik jehipieckaha viedamstva.
