U čaćvier prezident Ukrainy Piatro Parašenka vystupiŭ na sumiesnym pasiadžeńni pałat Kanhresa ZŠA. Jaho źjaŭleńnie było sustreta doŭhimi apładysmientami. Vopleski, avacyi pieraryvali jaho dziasiatki razoŭ. «Ukrainskaja armija, hetyja maładyja chłopcy — heta siońnia adzinaje, što adździalaje mirny śviet ad žachaŭ poŭnaha krachu i viartańnia ŭ minułaje stahodździe», — skazaŭ Parašenka. Havaryŭ jon na biezdakornaj anhlijskaj movie.
Źviartajučysia da amierykanskich kanhresmienaŭ, Parašenka papiaredziŭ pra pahrozu, jakuju ŭjaŭlajuć dziejańni Rasii dla ŭsiaho śvietu, i paprasiŭ Amieryku nie kidać Ukrainu ŭ biadzie.
«Naša nacyja vybrała svabodu i demakratyju. Inšaja nacyja vyrašyła pakarać Ukrainu za hetyja kroki. Śviet nie moža dazvolić takich pavodzinaŭ», — skazaŭ Parašenka.
Jon taksama padziakavaŭ ZŠA za padtrymku, adznačyŭ važnaść ekanamičnych sankcyj, uviedzienych suprać Rasii i paprasiŭ Amieryku być «bolš naporystaj» u pytańni ich prymianieńnia.
Parašenka nazvaŭ anieksiju Kryma cyničnaj zdradaj z boku Rasii.
Pavodle jaho słoŭ, anieksija Kryma pryviała da hłybokaha kryzisu biaśpieki ŭ Jeŭropie.
«Anieksiju Kryma stała adnoj z samych cyničnych zdradaŭ u sučasnaj historyi», — skazaŭ Parašenka.
Pry hetym jon adznačyŭ, što nie bačyć vajennaha rašeńnia krymskaj prablemy.
«Niama umoŭ, pry jakich my kali-niebudź źmirymsia z akupacyjaj Kryma … Ja nie kažu pra vajennaje vyrašeńnie krymskaj prablemy, heta prablema na mnohija hady», — skazaŭ ukrainski prezident.
«Ja zaklikaju śviet procidziejničać ahresaru siońnia i dziela budučyni», — zajaviŭ jon.
Parašenka raspavioŭ kanhresmienam ZŠA historyju zakatavanaha krymčanina Ryšata Amietava.
«30 sakavika, kali tolki pačałasia akupacyja Kryma, byŭ adzin čałaviek u Simfieropali, jaki zrabiŭ nievierahodnaje — Rašat Amietaŭ, — zajaviŭ Parašenka i raskazaŭ, što Amietava skrali, a zatym znajšli zakatavanym i zabitym. — Toje, što jon skazaŭ, vyklikaje muraški pa ciele. Jon zrabiŭ heta za svabodu, kab dzieci nie sutykalisia z rabstvam», — zajaviŭ Parašenka.
Jon taksama zajaviŭ, što ŭkrainskaja armija maje patrebu ŭ pastaŭkach zbroi. «Im (ukrainskim vajskoŭcam) treba bolš vajennaha abstalavańnia. Zbroi i ekipiroŭki. Jany terminova majuć patrebu ŭ hetym.
Koŭdrami vajny nie vyjhraješ. Koŭdrami miru nie abaroniš», — zajaviŭ Parašenka.
Pa słovach Parašenki, za čas pieramirja, jakoje było abvieščana 5 vieraśnia, na ŭschodzie krainy zahinuli 17 ukrainskich vajskoŭcaŭ.
«Śviet paŭstaŭ pierad strašnym kryzisam biaśpieki. I ciapier my stanovimsia śviedkam novaj sproby pieradziełu śvietu. Ukraina staić u centry hetaj sproby. Vynik siońniašniaj vajny vyznačyć, ci budziem my vymušanyja źmirycca z tym, što Jeŭropa stanie strašnaj i ciomnaj. Ciapier ukrainskaja armija, hetyja maładyja chłopcy — heta adzinaje, što staić zaraz pamiž śvietam mirnaha suisnavańnia i žacham poŭnaha krachu i viartańnia minułaha stahodździa», — zajaviŭ prezident.
Jon nahadaŭ, što «ŭkrainski narod, junaki i dziaŭčaty, ciapier stajać na froncie za svabodu. Nam patrebna vaša padtrymka».
«Havoračy pierad Kanhresam, ja chaču padziakavać kožnamu sałdatu za jaho achviaru. Śviet pavinien pryznać ich baraćbu bolšaj palityčnaj padtrymkaj, im treba bolš abstalavańnia», — zajaviŭ Parašenka.
«Hetak ža, jak Izrail, Ukraina maje prava abaraniać svaju terytoryju, i jana budzie rabić heta. Ja zaklikaju Amieryku dapamahčy nam», — dadaŭ jon.
U pačatku svajoj pramovie Parašenka adznačyŭ, što składana apisać, nakolki važnaja dla Ukrainy padtrymka kanhresa ZŠA ŭ kryzisnaj situacyi, kali nasielnictva jaho krainy «zmahajecca za demakratyju».
Pavodle jaho słoŭ, Ukraina raźličvaje na atrymańnie śpiecyjalnaha statusu sajuźnika ZŠA pa-za NATA.
«Vybar Jeŭropy i śvietu — heta nie vybar pamiž roznymi vidami cyvilizacyi. Heta vybar pamiž cyvilizacyjaj i varvarstvam», — zajaviŭ Parašenka.
