Šmatlikija mierapryjemstvy, prymierkavanyja da štohadovaj akcyi «Dni jeŭrapiejskaj spadčyny», prachodziać u vieraśni ŭ bibłijatekach i muziejach Biełarusi,
paviedamiła zahadčyca siektara pa achovie historyka-kulturnaj spadčyny ŭpraŭleńnia pa achovie historyka-kulturnaj spadčyny i restaŭracyi Minkultury Natalla Chvir.
Sioleta Biełaruś śviatkuje Dni jeŭrapiejskaj spadčyny ŭžo ŭ adzinaccaty raz. Tradycyja pačałasia z momantu padpisańnia biełaruskaj dziaržavaj 18 krasavika 1993 hoda Jeŭrapiejskaj kulturnaj kanviencyi Savieta Jeŭropy. Krainy, jakija adznačajuć heta ahulnajeŭrapiejskaje kulturnaje śviata, pryśviačajuć mierapryjemstvy ŭ ramkach hetaj akcyi peŭnaj temie. Sioleta ŭ Biełarusi akcyja prachodzić pad devizam «Prastora horada: placoŭka dla dziejańnia».
Uračysty viečar z nahody čarhovaj akcyi «Dni jeŭrapiejskaj spadčyny» adbyŭsia 18 vieraśnia ŭ staličnaj ratušy. Arhanizatarami hetaha mierapryjemstva vystupili Ministerstva kultury, Instytut biełaruskaj kultury, Minharvykankam i fond «Kulturnaja spadčyna i sučasnaść» pry padtrymcy Muzieja historyi horada Minska. Na sustrečy sabrałasia kala sta čałaviek, u liku jakich pradstaŭniki dypłamatyčnych misij, muziejnyja supracoŭniki, śpiecyjalisty pa achovie historyka-kulturnaj spadčyny, studenty.
Biełaruskaja tema akcyi — horad jak miesca dla dziejańnia — była abrana nievypadkova, adznačyŭ na adkryćci ŭračystaha viečara namieśnik ministra kultury Alaksandr Jacko.
«Horad i haradskaja spadčyna pradstaŭlajuć kulturu sučasnaj Biełarusi ŭ kantekście mižnarodnaj spadčyny, — skazaŭ čynoŭnik. — Niepasredna haradskaja spadčyna našaj krainy pradstaŭlena dosyć šyrokim śpiektram architekturna-budaŭničych pomnikaŭ, pomnikaŭ kultury i mastactva. Varta adznačyć, što haradskaja spadčyna — heta nie tolki materyjalnyja ab`iekty, ale i haradskaja mifałohija, imiony i spravy tych, chto šmat zrabiŭ dla svajho miesca. U biełaruskich haradach — ad staražytnych Połacka, Turava, Zasłaŭja da maładych Navapołacka i Novałukomla — histaryčna sfarmiravałasia admysłovaja atmaśfiera, jakaja i siońnia praciahvaje raźvivacca».
Siońnia važnaj zadačaj ź`iaŭlajecca «nie tolki zachavańnie, ale i prymnažeńnie haradskoj spadčyny». Hetaha, skazaŭ Jacko, možna dasiahnuć šlacham jaje pieraasensavańnia, praviadzieńnia ŭ haradskoj prastory roznych kulturnych mierapryjemstvaŭ. «Miežy haradskoj prastory ciapier pašyrajucca, i horad usio čaściej vykarystoŭvajecca ŭ jakaści placoŭki dla kulturnych akcyj», — dadaŭ namieśnik ministra kultury.
Ahulnajeŭrapiejskaje śviata pad nazvaj «Dni jeŭrapiejskaj spadčyny» zasnavana ŭ 1991 hodzie Savietam Jeŭropy. Mierapryjemstvy ŭ ramkach hetaha śviata pravodziacca z tym, kab abudzić cikavaść hramadskaści da zachavańnia pomnikaŭ historyi i kultury; paznajomić jeŭrapiejskich hramadzian z raznastajnaściu kulturnaj spadčyny kantynienta šlacham paraŭnańnia spadčyny krain Jeŭropy; źviarnuć uvahu na prablemu zachavańnia ab`iektaŭ spadčyny, jakija znachodziacca pad pahrozaj źniknieńnia; farmiravać šlach u budučyniu dziakujučy ŭśviedamleńniu pomnikaŭ kultury ŭ sučasnych sacyjalna-palityčnych, ekanamičnych i kulturnych umovach.
