18 vieraśnia ŭ Minsku prezientavali knihu «Čas niaspraŭdžanych nadziejaŭ», nadrukavanuju ŭ vydaviectvie «Łohvinaŭ».
Kniha ŭjaŭlaje saboj zbornik hutarak ź viadomymi biełaruskimi žurnalistami i redaktarami pra 1990-ja.
Uspaminami pra karotki, ale nadzvyčaj plonny pieryjad u historyi ajčynnaj žurnalistyki padzialilisia Maryna Bialackaja, Siamion Bukčyn, Alaksandr Valvačoŭ, Juryj Drakachrust, Siarhiej Dubaviec, Alaksandr Dubaviec, Alaksandr Kłaskoŭski, Piotr Marcaŭ, Ludmiła Maślukova, Alena Małočka, Ihar Asinski, Dźmitry Padbiarezski, Iosif Siaredzič, Alaksandr Starykievič, Ajałksandr Ulicionak, Alaksandr Fiaduta, Viačasłaŭ Chadasoŭski i Siarhiej Šaŭcoŭ.
Z kalehami hutaryli žurnalistki Natalla Kulinka i Natalla Fiadotava.
«Kniha intervju «Čas niaspraŭdžanych nadziejaŭ» — pra samyja darahija dla mianie hady, pačatak 1990-ch u historyi Biełarusi i jaje žurnalistyki», — piša ŭ pradmovie da vydańnia Natalla Kulinka.
Jaje kaleha, Natalla Fiadotava, piša: «Hety prajekt dla mianie ŭ pieršuju čarhu źviazany z žadańniem vykazać udziačnaść prafiesii».
Adnym samych kaštoŭnych nabytkaŭ 1990-ch Alaksandr Kłaskoŭski nazvaŭ dośvied pieramienaŭ. Jon pryhadaŭ, što z atrymańniem niezaležnaści žurnalistam daviałosia mnohamu navučycca. Žurnalist pryvioŭ słovy palitołaha Vitala Silickaha pra toje, što ŭsie dyktatury rujnujucca. Jon pierakanany, što kaštoŭny vopyt, prydbany dva dziasiatki hod tamu, jašče spatrebicca.
Siamion Bukčyn nie pahadziŭsia z nazvaj knihi. Heta naša historyja, u jakoj było miesca ramantyčnamu i burlivamu pačatku, jaki źmianiŭsia pieryjadam žorstkaha realizmu i tatalnym nastupam uładaŭ na atrymanyja razam ź niezaležnaściu svabody. Žurnalist paraiŭ pryhledziecca da padziejaŭ va Ukrainie. Ciapier tam adbyvajecca palityčnaje farmavańnie nacyi, skazaŭ Bukčyn. Jon pierakanany, što biełarusam varta vučycca va ŭkraincaŭ.
Siarhiej Dubaviec taksama nie zhadziŭsia ź piesimistyčnaj nazvaj knihi. Jon nazvaŭ 1990-ja najlepšym časam dla biełaruskaj žurnalistyki. Pa jaho słovach, u historyi krainy takich mahčymaściaŭ dahetul nikoli nie było. Jak i Alaksandr Kłaskoŭski, jon upeŭnieny, što atrymany dośvied jašče spatrebicca biełaruskim žurnalistam.
***
Natalla Kulinka — daktarant Univiersiteta Kalifornii — Santa Kruz, skončyła fakultet žurnalistyki Biełaruskaha dziaržaŭnaha ŭniviersiteta.
Natalla Fiadotava — kandydat fiłałahičnych navuk, dacent instytuta žurnalistyki Biełaruskaha dziaržaŭnaha ŭniviersiteta, skončyła fakultet žurnalistyki Biełaruskaha dziaržaŭnaha ŭniviersiteta.
