Zachodnija sankcyi ŭ dačynieńni da Rasii mohuć paŭpłyvać jak na košt kredytaŭ biełaruskich bankaŭ, tak i na pracu biełaruskich pradpryjemstvaŭ z rasijskim kapitałam.
Takoje mierkavańnie vykazaŭ finansavy analityk Daśledčaj hrupy BusinessForecast.by Alaksandr Mucha.»Na fonie sankcyj biełaruskija banki z rasijskim kapitałam mohuć sutyknucca z peŭnym adtokam srodkaŭ rasijskich akcyjanieraŭ razam z padaražeńniem resursaŭ, što vydzialajucca rasijskimi maciarynskimi bankami», — miarkuje Mucha.
Ministerstva pramysłovaści i handlu Rasii, adznačyŭ analityk, užo paviedamiła, što rasijskija banki paśla ŭviadzieńnia zachodnich sankcyj pavysili košt kredytaŭ dla pradpryjemstvaŭ.
Ciapier rasijskim bankam, jakija trapili pad sankcyi Jeŭrasajuza i ZŠA, naležyć niekalki daččynych bankaŭ u Biełarusi («BPS-Aščadbank», «Bank BiełZEB», «Biełhazprambank», «Bank VTB (Biełaruś)»).
«Na dolu rasijskich inviestaraŭ prypadaje 44,2% źniešnich daŭhavych abaviazacielstvaŭ daččynych biełaruskich bankaŭ. Tamu adtok srodkaŭ rasijskich rezidentaŭ z pasivaŭ bankaŭskaha siektara moža pryvieści da zapavolvańnia tempaŭ kredytavańnia i ekanamičnaha rostu ŭ Biełarusi», — miarkuje Mucha.
Akramia taho, analityk źviarnuŭ uvahu na toj fakt, što ryzyka adtoku srodkaŭ rasijskich inviestaraŭ tyčycca nie tolki bankaŭ, ale i biełaruskich pradpryjemstvaŭ z rasijskim kapitałam. «Pa stanie na 1 studzienia 2014 hoda ŭ Biełarusi dziejničała 2.746 pradpryjemstvaŭ z rasijskimi inviestycyjami, što składaje 35,7% ad ahulnaj kolkaści biełaruskich arhanizacyj z zamiežnymi inviestycyjami», — adznačyŭ ekśpiert.
U vieraśni Jeŭrasajuz i ZŠA ŭ suviazi z rasijska-ŭkrainskim uzbrojenym kanfliktam uviali novyja sankcyi ŭ dačynieńni da Rasii. Pad sankcyi trapili rasijskija enierhietyčnyja kampanii («Raśniefć», «Hazprom niefć» i «Tranśniefć»). Sankcyi dziejničajuć i ŭ dačynieńni da šerahu bujnych rasijskich bankaŭ («Aščadbank», «Hazprambank», «Raśsielhasbank», a taksama «ZEB» i «VTB»).
