Mižnarodnyja navukovyja čytańni «Rehijanalnaje, nacyjanalnaje i ahulnačałaviečaje ŭ słavianskich litaraturach», pryśviečanyja pamiaci narodnaha piśmieńnika Biełarusi Ivana Navumienki, projduć u Homieli 25—26 vieraśnia.
Arhanizatary mierapryjemstva — Homielski dziaržaŭny ŭniviersitet imia Francyska Skaryny i miascovy filijał Nacyjanalnaj akademii navuk.
Jak paviedamili na kafiedry biełaruskaj litaratury HDU, u kanfierencyi biaruć udzieł dzieci narodnaha piśmieńnika, aŭtarytetnyja vučonyja z Rasii, Ukrainy, Polščy, Čarnahoryi, Hiermanii. Prafiesar Oldenburhskaha ŭniviersiteta Hun-Bryt Koler, jakaja daskanała vałodaje biełaruskaj movaj, vystupić na plenarnym pasiadžeńni z dakładam pa-biełarusku.
Na plenarnych pasiadžeńniach i ŭ troch siekcyjach buduć razhledžanyja aktualnyja prablemy spadčyny Ivana Navumienki, jaje miesca ŭ sučasnym litaraturnym pracesie, a taksama ŭzajemadziejańnie rehijanalnych i ahulnačałaviečych pačatkaŭ u słavianskich litaraturach i pierśpiektyvy litaratury kłasičnaha typu ŭ epochu hłabalizacyi.
U ramkach kanfierencyi projdzie čarhovaja prezientacyja treciaha i čaćviortaha tamoŭ z zapłanavanaha dziesiacitomnaha zboru tvoraŭ, jakija buduć uručanyja pradstaŭnikam biblijatek horada i vobłaści.
Arhanizatary spadziajucca, što praviadzieńnie navukovych čytańniaŭ budzie spryjać aktyvizacyi duchoŭnaha žyćcia Homielskaj vobłaści i roskvitu nacyjanalnaj kultury.
Ivan Navumienka (1925—2006) naradziŭsia u miastečku Vasilevičy Rečyckaha rajona Homielskaj vobłaści. U hady vajny — udzielnik kamsamolskaha padpolla, partyzan, udzielničaŭ u bajach na Leninhradskim i 1-m Ukrainskim frantach. Byŭ zahadčykam adździeła prozy časopisa «Maładość», zahadvaŭ kafiedraj biełaruskaj litaratury BDU, pracavaŭ dyrektaram Instytuta litaratury imia Ja. Kupały AN BSSR, vice-prezidentam AN BSSR. Staršynia Viarchoŭnaha Savieta BSSR (1985—1990). Akademik AN BSSR, doktar fiłałahičnych navuk, prafiesar. Člen Sajuza piśmieńnikaŭ SSSR.
Aŭtar knih apaviadańniaŭ, apovieściaŭ «Siamnaccataj viasnoj», «Chłopcy-ravieśniki», «Vierasy na vyžarynach», «Bulba», «Vodhulle dalokich viosnaŭ», ramanaŭ «Sasna pry darozie», «Viecier u sosnach», «Sorak treci», «Smutak biełych načej» i inšych tvoraŭ.
Uznaharodžany ordenami Ajčynnaj vajny II stupieni, Čyrvonaj Zorki, Pracoŭnaha Čyrvonaha Ściaha, Kastryčnickaj Revalucyi, miedalom Francyska Skaryny i inšymi miedalami. Zasłužany dziejač navuki Biełaruskaj SSR. Łaŭreat premii Leninskaha kamsamoła Biełarusi, dziaržaŭnaj premii BSSR imia Jakuba Kołasa.
