fota Belgazeta.by
Hienieralny sud ES anulavaŭ uklučeńnie biełaruskaha žurnalista ŭ śpis asobaŭ, jakija padlahajuć abmiežavalnym mieram. Maŭlaŭ, jaho prahrama nie ŭpłyvovaja.
Na dumku suda, jak pieradaje neurope.eu, Jeŭrapiejski saviet parušyŭ pravy na abaronu žurnalista i pamyliŭsia ŭ acency pryčynaŭ, pa jakich jaho ŭklučyli ŭ śpis.
Alaksiej Michalčanka — žurnalist na telekanale ANT. U Čorny śpis ES jon trapiŭ na pačatku 2011 hoda z nastupnym abhruntavańniem: «Žurnalist dziaržaŭnaha telekanała ANT z vysokim i ŭpłyvovym stanoviščam». U 2012 hodzie Saviet ES padtrymaŭ hetyja miery, i abhruntavaŭ nastupnym čynam: «Žurnalist dziaržaŭnaha telekanała ANT z upłyvovaj pazicyjaj. Jon źjaŭlajecca viadučym teleprahramy «Jak jość, tak jość». Hetaja prahrama źjaŭlajecca instrumientam dziaržaŭnaj prapahandy na TB, jakaja padtrymlivaje i apraŭdvaje represii demakratyčnaj apazicyi i hramadzianskaj supolnaści». U abhruntavańni havaryłasia, što apazicyja i hramadzianskaja supolnaść u prahramie sistematyčna aśviatlalisia niehatyŭna i hrebliva. Adznačałasia, što Michalčanka byŭ asabliva aktyŭny ŭ hetych adnosinach paśla razhonu mirnaj demanstracyi 19 śniežnia 2010 hoda i nastupnych pratestaŭ.
Hienieralny sud padtrymaŭ chadajnictva Michalčanki ab pryznańni hetych zapisaŭ niesapraŭdnymi.
Sud paličyŭ, što ŭ 2012 hodzie prava na abaronu Michalčanki było parušanaje, kali pamianialisia farmuloŭki. Taksama sud ličyć, što Saviet pamyliŭsia ŭ acency źviestak u 2011 hodzie. Z analizu dakumientaŭ nie vidać, što Michalčanka źjaŭlajecca ŭpłyvovym žurnalistam na vysokaj pasadzie ŭ struktury ANT. Jon, maŭlaŭ, prosta palityčny kamientatar u navinach i viadoŭca teleprahramy «Jak jość, tak jość». Saviet ES nie pryvioŭ nijakich dokazaŭ, zdolnych prademanstravać upłyŭ, realnaje ŭździejańnie abo adkaznaść Michalčanki ŭ parušeńni mižnarodnych vybarčych standartaŭ i represijaŭ hramadzianskaj supolnaści i demakratyčnaj apazicyi.
