U Minskim abłasnym sudzie pačaŭsia razhlad spravy byłoha hienieralnaha dyrektara «Barysaŭdreva» Uładzimira Malcava. Jaho vinavaciać u pryčynieńni strataŭ dziaržavie na $2 miljony i zryvie madernizacyi pradpryjemstva.
«Pry vybary pastaŭščyka abstalavańnia Malcaŭ nie adchiliŭ prapanovu tureckaj kampanii «Piersiej», abstalavańnie jakoj nie adkazvała nieabchodnym patrabavańniam. Pry hety jon, razumiejučy straty, jakija nanosiacca pradpryjemstvu, nie razhledzieŭ inšych udzielnikaŭ konkursa. Kali tureckaja kampanija pačała zaciahvać terminy pastaŭki abstalavańnia, Malcaŭ nie zrabiŭ krokaŭ u adkaz. A paśla zaklučyŭ z kampanijaj damovu na mantaž abstalavańnia, choć taja nie mieła dazvołu na hety vid pracaŭ», – zajaviŭ dziaržaŭny abvinavaŭca.
Kryminalnaja sprava za złoŭžyvańnie słužbovymi paŭnamoctvami – dalnija adhałoski raznosu, jaki ŭčyniŭ Alaksandr Łukašenka, naviedaŭšy «Barysaŭdreŭ» 7 listapada 2013 hoda. Tady jon adchiliŭsia ad prapanavanaha maršruta i ŭbačyŭ na pradpryjemstvie nieprybranuju terytoryju.
Ad pasadaŭ byli adchilenyja hubiernatar Minskaj vobłaści Barys Batura, namieśnik kiraŭnika Administracyi prezidenta Andrej Tur, a taksama kiraŭnik «Biellespapierprama» Alaksandr Pierajasłaŭcaŭ. Dastałasia i Malcavu, adnak užo na nastupny dzień jaho «pamiłavali». Dziaržaŭnyja telekanały źniali siužety pra maładoha haspadarlivaha dyrektara, jakoha nibyta padstavili biezadkaznyja čynoŭniki.
U efiry ANT Uładzimir Malcaŭ tady jakraz patłumačyŭ akaličnaści «tureckaj spravy».
Hladzieć z 15:50.
Kali ŭźnikła pytańnie, čamu damova na mantaž abstalavańnia zaklučanaja z zamiežnikami, pryciahnuli miascovuju kampaniju.
«Try letnija miesiacy nichto nie pačynaŭ mantaž. Ja pačynaju ŭ ministerstva architektury, u abłvykankam, u dziaržkantrol… – što rabić budziem? Paŭtorna abviaščaju konkurs, nichto nie zhadžajecca. Prychodzić adziny padradčyk – tureckaja kampanija. Što rabić? Składajem list da Siamaški za podpisam troch ministraŭ, paśla dazvołu zaklučajem kantrakt. I tut jak tut pryjazžaje dziaržkantrol. I mianie za zaklučeńnie hetaha kantrakta pačynajuć štrafavać. Tamu što listy ŭdziačnaści ad tureckaj kampanii pa-anhlijsku, a pavinny być pa-rusku», —
raskazaŭ tady Malcaŭ.
Za złoŭžyvańnie słužbovymi paŭnamoctvami jamu pahražaje da 10 hadoŭ pazbaŭleńnia svabody z kanfiskacyjaj majomaści.
