Za padpał z reŭnaści prysudžany da pazbaŭleńnia voli 58-hadovy žychar Baranavičaŭ.
Jak paviedamiła BiełaPAN staršy prakuror adździeła prakuratury Bresckaj vobłaści Łarysa Karanievič, dniom 8 maja mužčyna-piensijanier pasvaryŭsia z 47-hadovaj sužycielkaj, jakaja pražyvaje ŭ jaho kvatery. Paśla hetaha jana pajšła ŭ hości da 72-hadovaha susieda, jaki žyvie ŭ hetym ža padjeździe. Pra što paviedamiła svajmu sužycielu.
58-hadovy mužčyna, jaki znachodziŭsia ŭ stanie ałkaholnaha apjanieńnia, pryraŭnavaŭ žančynu da sastarełaha piensijaniera. Spačatku raŭniviec prynios kvietki, jakija ŭ hety dzień padaryŭ sužycielcy, i pakinuŭ ich u mietaličnych dźviarach kvatery pažyłoha susieda. Praź niekalki hadzin prynios tudy abklejenuju špalerami fanieru, abliŭ jaje haručaj vadkaściu i padpaliŭ. Paśla čaho schavaŭsia.
Haspadar kvatery i jaho hościa, adčuŭšy dym, stali znutry zalivać vadoj dźviery, astudžajučy ich. Vyjści z kvatery jany nie mahli, bo zamok raspłaviŭsia.
U vyniku padpału dźviery sapsavalisia. Mužčyna i žančyna, jakija znachodzilisia ŭ kvatery, nie paciarpieli.
8 žniŭnia sud Baranavickaha rajona i horada Baranavičy pryznaŭ 58-hadovaha mužčynu vinavatym u źniščeńni majomaści, ździejśnienym ahulnaniebiaśpiečnym sposabam (č. 2 art. 218 KK) i pryhavaryŭ da troch hadoŭ pazbaŭleńnia voli z adbyćciom pakarańnia ŭ kałonii ŭzmocnienaha režymu. Ź jaho spahnanaja pryčynienaja susiedu škodu ŭ pamiery 2,4 młn. rubloŭ.
Pa rašeńni suda abvinavačanamu pryznačana prymusovaje lačeńnie ad chraničnaha ałkahalizmu.
23 vieraśnia sudovaja kalehija pa kryminalnych spravach Bresckaha abłasnoha suda pakinuła prysud bieź źmieny, i jon ustupiŭ u zakonnuju siłu.
