U apošnija hady virusy hrypu ŭ Biełarusi «pavodziać siabie nie zusim pa praviłach», paviedamiła na pres-kanfierencyi 23 vieraśnia ŭ Minsku kiraŭnik Nacyjanalnaha centra pa hrypie, viadučy supracoŭnik Respublikanskaha navukova-praktyčnaha centra epidemijałohii i mikrabijałohii Natalla Hrybkova.
«Epidemičnyja pieryjady z uzdymam zachvorvańnia čarhujucca ź vielmi spakojnymi hadami, jakim, naprykład, u nas byŭ minuły hod. Heta byŭ vielmi spakojny hod, i ažyŭleńnie cyrkulacyi hrypu my nazirali vielmi pozna — u krasaviku—mai», — skazała jana.
Pavodle słoŭ Hrybkovaj, z 1970-ch hadoŭ u śviecie adnačasova cyrkulavali try padtypy virusa hrypu, adnak apošnim časam ich lik pavialičyŭsia da čatyroch. «Na siońniašni dzień čałaviek maje mahčymaść zarazicca čatyrma virusami hrypu», — rastłumačyła jana.
Tym nie mienš, adznačyła Hrybkova, prapanavanyja ŭ Biełarusi vakcyny źjaŭlajucca trochvalentnymi i abaraniajuć ad troch padtypaŭ virusa. Jana rastłumačyła, što adzin z čatyroch padtypaŭ sioleta vielmi redka sustrakaŭsia ŭ paŭdniovym paŭšarji, dzie ciapier zaviaršajecca epidemičny siezon. «Siarod cyrkulujučych virusaŭ typu V pieravažajuć pradstaŭniki jamahatskaj evalucyjnaj linii. U minułyja hady pieravažała viktaryjanskaja linija, a ciapier jana adychodzić na druhi płan i sustrakajecca vielmi redka», — raskazała Hrybkova.
U toj ža čas u śviecie isnujuć i čatyrochvalentnyja vakcyny ad hrypu, adnak, pavodle mierkavańnia śpiecyjalista, u Biełarusi niama nieabchodnaści ŭ ich prymianieńni. «Miarkujučy pa etyjałahičnaj struktury cyrkulujučych virusaŭ, niama nieabchodnaści ŭ hetaj vakcynie, tamu što virusy viktaryjanskaj linii cyrkulavali na praciahu apošnich niekalkich hadoŭ i isnuje tak zvany kalektyŭny imunitet u ludziej, jakija pierachvareli hetym virusam», — adznačyła jana.
