Svajo abureńnie dziejańniami Zachadu ciapier moža vykazać kožny, nadzieŭšy dyzajnierskuju majku z patryjatyčnym malunkam. Biaspłatny abmien futbołak z zamiežnaj simvolikaj na futbołki z patryjatyčnymi łozunhami prachodzić u centry Maskvy la pomnika Alaksandru Puškinu.
Na abmien prapanujucca, u pryvatnaści, majki z tekstam himna Rasii na fonie sabora Vasila Błažennaha, z malunkam rakiet «Iskander» i podpisam «Sankcyi? Nie śmiašycie maje Iskandery», a taksama majki z nadpisam «Pasažyr z Rasii — pry sankcyjach nie budzić».
Aktrysa Volha Kabo (sprava) padčas akcyi «Modny adkaz — sankcyjam nie!» na Puškinskaj płoščy
Jak raspaviała dyzajnier Anastasija Zadoryna, jaje firma vyrabiła 30 tys. aryhinalnych futbołak: «Modny adkaz — sankcyjam nie!» (Modnyj otviet — sankcijam niet!) — tak nazyvajecca naša akcyja», — patłumačyła jana.
Siarod pieršych udzielnikaŭ akcyi — piśmieńnik Aleh Roj, jon abraŭ majku z vyjavaj pijanierskaha halštuka vakoł kaŭniara i nadpisam «U nas svaje prykoły biez vašaj koka koły».
Aktrysa Volha Kabo nadzieła futbołku «Topal sankcyj nie baicca» z vyjavaj mabilnaha stratehičnaha kompleksu. Aktrysa spadziajecca, što mižnarodnaje supraćstajańnie chutka skončycca. «Dźvie takija tvorčyja krainy, jak Rasija i Ukraina, pavinny być razam», — pierakananaja Kaba.
Pa słovach adnaho z arhanizataraŭ akcyi prezidenta fondu «Sadziejničańnie» Ksienii Mielnikavaj, asnoŭnaja ideja mierapryjemstva — pakazać usiamu śvietu, što «Rasija sankcyj nie baicca».
Mielnikava taksama raspaviała, što arhanizatary hatovyja davać majki nie tolki na abmien, ale i prosta tak, «kab ludzi mahli zajavić ab svajoj patryjatyčnaj pazicyi».
«Što ž tyčycca losu majek z zamiežnymi nadpisami, my budziem ich utylizavać, moža być, stvorym art-abjekt», — skazała jana. Hramadski dziejač adznačyła, što akcyju spansujuć dźvie rasijskija kampanii. Dla dalejšaj padtrymki, «mahčyma, budzie arhanizavany narodny fandrajzinh», paviedamiła Mielnikava.
Jak raspaviali arhanizatary, dla šyraty achopu i zručnaści hramadzian aŭtobus akcyi budzie pierajazdžać z adnaho miesca na inšaje. Płanujecca, što ŭ Maskvie majki buduć mianiać dva tydni. Zatym aŭtobus adpravicca pa rehijonach, u tym liku ŭ Krym. A 29 vieraśnia majki buduć vydavać pasažyram u aeraporcie Unukava.
