Premjer-ministr Biełarusi Michaił Miaśnikovič pravioŭ dvuchbakovyja sustrečy z kiraŭnikami dziaržaŭ i ŭradaŭ zamiežnych krain, jakija ŭziali ŭdzieł u samicie AAN pa pytańniach klimatu 23 vieraśnia ŭ Ńju-Jorku, paviedamiła pres-słužba biełaruskaha ŭrada.
U pryvatnaści, jon abmierkavaŭ z prezidentam Manholii Cachiahijnam Ełbehdoržam chod padrychtoŭki jaho vizitu ŭ Biełaruś. «Byli adznačany peŭnyja pośpiechi ŭ realizacyi našych sumiesnych prajektaŭ i damoŭlenaściaŭ, u pieršuju čarhu heta tyčycca transpartnaha kalidora. Tyja pahadnieńni i damoŭlenaści, jakija byli na stadyi ramačnych pahadnieńniaŭ, buduć raskrytyja i zamacavanyja padčas vizitu prezidenta Manholii ŭ našu krainu, jaki maje adbycca. Ministerstvy transpartu adpracavali adpaviedny pytańni. Heta buduć dastatkova vyhadnyja dla abodvuch bakoŭ prajekty», — cytuje premjer-ministra Biełarusi pres-słužba ŭrada.
Miaśnikovič prapanavaŭ manholskamu boku «šyrej vykarystoŭvać mahčymaści čyhunačnaha tranzitu praź Biełaruś». Jon taksama zajaviŭ ab hatoŭnaści vydzialeńnia Manholii ekspartnaha kredytu na kuplu biełaruskaj karjernaj techniki, prapanavaŭ padumać nad sumiesnymi prajektami ŭ śfiery sielskaj haspadarki. «My stvaryli peŭnuju infrastrukturu dla taho, kab našy «BiełAZy» mahli pradavacca i pracavać niepasredna ŭ karjerach na radoviščach u Manholii. U nas dastatkova ambicyjnyja płany pa hetym pytańni. Dumaju, što prodažy ŭ najbližejšyja hod-paŭtara buduć vyličacca dziasiatkami adzinak našaj ciažkaj karjernaj techniki», — zaznačyŭ premjer-ministr.
Na dumku bakoŭ, z adkryćciom pasolstva Biełarusi va Ułan-Batary ekanamičnaje supracoŭnictva pamiž dźviuma krainami pavinna być istotna aktyvizavanaje. Prezident Manholii vysoka acaniŭ inicyjatyvy Alaksandra Łukašenki pa vyrašeńni ŭkrainskaha kryzisu, paviedamlaje pres-słužba.
Padčas pieramoŭ z premjer-ministram Tadžykistana Kachiram Rasułzada Miaśnikovič prapanavaŭ jamu naviedać Biełaruś u listapadzie—śniežni hetaha hoda. Abmierkavany pierśpiektyvy zakupki biełaruskaj karjernaj techniki, zborki traktaroŭ u Tadžykistanie, pastaŭki biełaruskaj sielhaspradukcyi.
Ź pieršym vice-premjeram Turkmienistana Rašydam Mieredavym kiraŭnik biełaruskaha ŭrada padrabiazna abmierkavaŭ padrychtoŭku zapłanavanaha na kastryčnik vizitu ŭ Biełaruś prezidenta Turkmienistana Hurbanhuły Bierdymuchamiedava. Baki razhledzieli pytańni, źviazanyja z budaŭnictvam Harłykskaha horna-abahačalnaha kambinata.
Aprača taho, adbylisia sustrečy Michaiła Miaśnikoviča z prezidentam Irana Chasanam Ruchani i prezidentam Słavienii Borutam Pachoram.
