U Jeŭropie nie razumiejuć, čamu Rasija maryć ab adnaŭleńni Savieckaha Sajuza, i čakajuć praciahu adnosin jak z krainaj-susiedam paśla taho, jak Maskva adnović davier.
Pra heta ŭ svaim vystupie ŭ Prynstanskim univiersitecie (ZŠA) zajaviŭ prezident Jeŭrapiejskaha Savieta (ES) Chierman Van Rampiej, adkazvajučy na pytańni studentaŭ ab situacyi va Ukrainie ŭ śviatle destabilizujučaj roli Rasii.
«Rasija ŭsio jašče maryć pra minułaje, pra były Saviecki sajuz. Nam u Jeŭropie navat ciažka zrazumieć, čamu. U nas u ES jość Abjadnanaje Karaleŭstva, Francyja, Hiermanija — usie jany byli zvyšdziaržavami. Ale jany admovilisia ad hetaj mary i pieraharnuli staronku. Jeŭrapiejski Sajuz — heta vyrazny znak, što minułaje — prajšło, i pačaŭsia novy raździeł historyi. Ale Rasija — nie na hetym etapie. Jany pavinny zrazumieć, što isnuje novy śviet, — skazaŭ jon.
Prezident ES adznačyŭ, što «całkam vidavočna, što Ukraina zaŭsiody budzie mieć asablivyja adnosiny z Rasijaj, navat kali ŭ ich buduć ciesnyja suviazi z nami».
«Ale pierad tym, jak my znoŭ pačniem mieć spravu z Rasijaj, my pavinny adnavić davier, a abiacańni pavinny vykonvacca. Ale hetaha nie było ŭ apošnija miesiacy. Naša meta — mieć svabodnuju, demakratyčnuju i bahatuju Ukrainu, jakaja dumaje pa-jeŭrapiejsku, ale maje dobryja adnosiny z Rasijaj. Z našaha boku my budziem mieć spravu z Rasijaj jak z susiedam, ale umoŭ dla hetaha jašče niama», — padkreśliŭ Rampiej.
