Alaksandr Łukašenka ličyć, što ŭsio, što adbyłosia na Majdanie, — niapravilna i niekanstytucyjna. Takoje mierkavańnie jon vykazaŭ siońnia, adkazvajučy na pytańni žurnalistaŭ u Kišyniovie.
«Tam zahinuli ludzi z dvuch bakoŭ. Heta drenna. I ŭ kožnaha zahinułaha, u kaleki jość baćki, svajaki. Niechta syna straciŭ ci atrymaŭ skalečanym, niechta straciŭ muža, dzieci pazbavilisia baćki… Heta što, narmalna? Heta nienarmalna. Heta maja pazicyja i biełaruskaha naroda», — adznačyŭ kiraŭnik Biełarusi.
Biełaruski lidar ličyć, što padzieł žycharoŭ adnoj krainy na zachodnich i ŭschodnich stvarajecca štučna, kab sutyknuć narody, kab znajści matyvacyju dla svaich pazicyj.
Alaksandr Łukašenka paprasiŭ nie ličyć jaho miratvorcam ŭkrainskaha kanfliktu, bo, pa jaho słovach, jon prosta robić toje, pra što jaho paprasili. «Tak skłałasia, što Biełaruś stała zručnaj placoŭkaj dla pieramoŭ. I ja jak haspadar niešta sprabavaŭ zrabić u hetym płanie, a maja zasłuha ŭ hetym nievialikaja», — skazaŭ jon.
Jon adznačyŭ, što ŭ jaho jość peŭnaja asabistaja matyvacyja, pakolki jon maje ŭkrainskija karani, a taksama nie moža hladzieć, kali «płačuć dzieci, a kali hinuć — naohuł katastrofa».
«Upeŭnieny, my, słavianskija narody, pieradolejem hetyja ciažkaści, — skazaŭ biełaruski lidar. — Lubaja vajna skančajecca miram».
