Alaksandr Łukašenka 25 vieraśnia, u druhi dzień aficyjnaha vizitu ŭ Małdovu, sustreŭsia sa staršynioj parłamienta hetaj krainy Iharam Kormanam, lidarami parłamienckich frakcyj, a taksama premjer-ministram Juryjem Lanke.
Pavodle mierkavańnia Łukašenki, u najbližejšyja hady Małdova moža dasiahnuć dobrych vynikaŭ raźvićcia. «Vašu krainu za piać hadoŭ možna zrabić kali nie kvitniejučaj, to vydatnaj, — cytuje biełaruskaha kiraŭnika jaho pres-słužba. — Važna, kab paśla vybaraŭ była adzinaja kansalidacyja, ci choć by kab va ŭradzie nie pieraškadžali pracavać».
Łukašenka razam z małdaŭskim prezidentam Mikałajem Cimofci ŭziaŭ udzieł u cyrymonii ŭračystaha adkryćcia ŭ Kišyniovie kamiercyjnaha centra pa prodažy kieramičnaj plitki i sanitarnaj kieramiki biełaruskaha pradpryjemstva «Kieramin».
Łukašenka nazvaŭ heta znakavaj padziejaj, jakaja krasamoŭna śviedčyć ab raźvićci dziełavoha supracoŭnictva pamiž dźviuma krainami. «Rady, što adna z samych starych vytvorčaściaŭ Biełarusi kožny hod uzmacniaje svaje pazicyi na rynku Sadružnaści Niezaležnych Dziaržaŭ i Jeŭropy. Naša pradpryjemstva maje vysoki aŭtarytet siarod partnioraŭ dziakujučy sučasnamu stylu, dobramu dyzajnu, vydatnaj jakaści i šyrokamu vybaru pradukcyi», — adznačyŭ jon.
Łukašenka ličyć, što novy najbujniejšy ŭ Kišyniovie handlovy centr dazvolić padniać uzrovień arhanizacyi absłuhoŭvańnia pakupnikoŭ. Pavodle jaho mierkavańnia, hetamu pasłužyć i toje, što akramia kieramiki tut pradstaŭlena jakasnaja pradukcyja inšych biełaruskich vytvorcaŭ.
Kiraŭnik Biełarusi vykazaŭ padziaku kiraŭnikam «Kieramin-Kišynioŭ» za rašeńnie ab vydzialeńni biełaruskaj abščynie Małdovy płoščaŭ dla raźmiaščeńnia tut Centra biełaruskaj kultury imia Janki Kupały. «Upeŭnieny, jon stanie pryvabnym astraŭkom «biełaruskaj ziamli» ŭ Małdovie i budzie spryjać prasoŭvańniu biełaruskaj kultury i ŭmacavańniu družby pamiž našymi narodami», — skazaŭ jon.
Łukašenka adznačyŭ, što padčas pieramoŭ ź Cimofci, a taksama premjer-ministram i śpikieram parłamienta išła havorka pra «niaprostyja časy», jakija pieražyvaje Małdova, paviedamlaje pres-słužba. «Usio heta pieraadolna, tolki treba zhurtavacca i ŭ hetym kirunku dziejničać. A my budziem vam nadziejnymi spadarožnikami», — skazaŭ Łukašenka.
Kiraŭniki dźviuch dziaržaŭ ahledzieli handlovy centr, ahulnaja płošča jakoha składaje bolš za 15 tys. kv. m. Łukašenka pahutaryŭ z pradstaŭnikami biełaruskaj dyjaspary. Kiraŭnik hramadskaj arhanizacyi «Biełaruskaja abščyna Respubliki Małdova» Juryj Statkievič padaryŭ Łukašenku draŭlanaje pano, a vieteran Vialikaj Ajčynnaj vajny Uładzimir Vajcachovič — knihu miemuaraŭ.
Łukašenka taksama ŭskłaŭ vianok da pomnika Stefanu Vialikamu ŭ Kišyniovie.
