Pra adstaŭku čynoŭnika ničoha nie paviedamlałasia ŭ aficyjnych zvodkach. Ad 2008 hoda Kryštapovič źjaŭlaŭsia namieśnikam dyrektara Infarmacyjna-analityčnaha centra pry Administracyi prezidenta. Na sajcie IAC proźvišča Kryštapoviča ŭžo prybranaje ź śpisu kiraŭnictva.
U apošnim pa časie numary časopisu «Biełaruskaja dumka» nadrukavany artykuł Lva Kryštapoviča i byłoha ministra infarmacyi Aleha Pralaskoŭskaha «Vialiki vierasień», pryśviečany 75-hodździu ŭźjadnańnia Biełarusi.
Ź bijahrafičnaj daviedki vynikaje, što ciapier Leŭ Kryštapovič źjaŭlajecca načalnikam navukova-daśledčaha adździełu Biełaruskaha dziaržaŭnaha ŭniviersiteta kultury i mastactva.
Lvu Kryštapoviču 65 hadoŭ. Jon naradziŭsia ŭ vioscy Piekalin Smalavickaha rajona. Skončyŭ histfak BDU. Doktar fiłasofskich navuk, prafiesar.
Aŭtar knih: «Biełaruś jak ruskaja śviatynia», «Biełaruś i Rasija: histaryjasofskaje i cyvilizacyjnaje adzinstva». Uvachodzić u śpis nieŭjaznych u Jeŭrasajuz biełaruskich čynoŭnikaŭ.
Kryštapovič prytrymlivajecca zachodnierusisckich pohladaŭ, jakija ŭvažajuć ruskich, biełarusaŭ i ŭkraincaŭ adnym narodam. Źjaŭlajecca ŭdzielnikam prajekta «Zachodniaja Ruś», stały aŭtar sajta zapadrus.su.
Za čas pracy ŭ IAC Kryštapovič zapomniŭsia krytykaj prahramy Ministerstva kultury «Zamki Biełarusi», jakaja mieła na mecie adnaŭleńnie stračanaj architekturnaj spadčyny. Kryštapovič ža zaznačyŭ, što «mahnaty Radziviły, Sapiehi, Ahinskija nie majuć ničoha supolnaha ź biełaruskaj mientalnaściu», a historyju VKŁ varta vykinuć «na zvałku historyi».
Letaś Leŭ Kryštapovič atrymaŭ orden Družby ad Uładzimira Pucina za vialiki ŭkład va ŭmacavańnie družby i supracoŭnictva z Rasijskaj Fiederacyjaj.
Varta adznačyć, što ŭ lipieni ŭ IAC źmianiŭsia dyrektar: zamiest byłoha pres-sakratara KDB Uładzimira Bazanava pasadu zaniaŭ juryst Alaksiej Dzierbin (jon taksama ŭ minułym supracoŭničaŭ z KDB).
