U žychara vioski Turki Babrujskaha rajona z pčalinaha vulla na prysiadzibnym pčalniku vykrali vino i $14 tysiač. Pra heta paviedamiła aficyjny pradstaŭnik upraŭleńnia Śledčaha kamiteta pa Mahiloŭskaj vobłaści Aksana Salaniuk.
Złačynstva ździejśnili nočču 19 vieraśnia 15 i 17-hadovyja padletki, vypadkova daviedaŭšysia, dzie viaskoviec chavaje vino. Možna tolki ŭjavić, jakaja była ich radaść i ździŭleńnie, kali jany znajšli ŭ dadatak da śpirtnoha bujnuju sumu hrošaj — «załatyja» pčołki nanosili ŭ vulej $14 tysiač. Praŭda, atrymać asałodu ad hetych «daroŭ» chłopcy nie paśpieli. Pabačyŭšy spustošany tajnik, paciarpieły ranicaj źviarnuŭsia ŭ milicyju. Pravaachoŭniki pa haračych śladach zatrymali złamyśnikaŭ. Usie vykradzienyja hrošy byli kanfiskavanyja pry pieratrusie ŭ zatrymanych.
Pa słovach paciarpiełaha, jon byŭ upeŭnieny, što pčaliny vulej — heta nadziejnaja schovanka i ŭ jaje nichto nie palezie, pabajaŭšysia napadu pčoł. Voś tamu jon i schavaŭ u pustym vulli usio svajo bahaćcie.
U dačynieńni da pravaparušalnikaŭ raspačata kryminalnaja sprava pa č.3 art.205 (kradziež, učynieny ŭ bujnym pamiery) KK Biełarusi. Viadziecca śledstva.
