U Turavie (Žytkavicki rajon Homielskaj vobłaści) 28 vieraśnia adbudziecca piaty Fiestyval kulikoŭ, zaklikany źviarnuć uvahu na Turaŭski łuh.
Arhanizatarami fiestyvalu vystupili hramadskaja arhanizacyja «Achova ptušak Baćkaŭščyny» i Turaŭski haradski vykanaŭčy kamitet.
Adkryćcio fiestyvalu adbudziecca ŭ 11 hadzin, z 11.30 da 13.30 arhanizatary zaprašajuć na śviata «Haspadar Turaŭskaha łuha», dzie projdzie konkurs pryvitańniaŭ školnych kamand «Kuličynaje pryvitańnie», defile «Kuličynaja moda» i kancert «Pieśni Turaŭskaha bałońnia» z udziełam hurtu Vuraj.
«Upieršyniu ŭ ramkach fiestyvalu projdzie mastacki plener «Farby Turaŭskaha łuha». U im voźmuć udzieł vučni Minskaj dziaržaŭnaj himnazii-kaledža mastactvaŭ i škoły mastactvaŭ z Turava. Dzieci buduć malavać unikalnyja piejzažy Turaŭščyny», — skazała kaardynatar fiestyvalu Lidzija Pšanicyna.
Akramia taho, u ramkach fiestyvalu projduć spartyŭnyja konkursy, intelektualnyja viktaryny i majstar-kłasy.
Turaŭski łuh ź`iaŭlajecca adnym z najbolš važnych miescaŭ dla hniezdavańnia i prypynku padčas mihracyj bolš jak 50 vidaŭ vodna-bałotnych ptušak. Jamu prysvojeny mižnarodny status «terytoryi, važnaj dla ptušak», a taksama status bijałahičnaha zakaźnika.
Na Turaŭskim łuzie znachodzicca najbujniejšaje ŭ Biełarusi stabilnaje pasielišča zaniesienaha ŭ Čyrvonuju knihu adnaho ź vidaŭ kulika — maradunki, u honar jakoha ŭ 2009 hodzie ŭ horadzie byŭ ustanoŭleny adziny ŭ śviecie pomnik. U sakaviku 2014 hoda arnitołahi ŭstanavili na Turaŭskim łuzie absalutny rekord uličanych ptušak: 200 tysiač asobin na 1 kvadratnym kiłamietry.
