Raśsielhasnahlad źviarnuŭsia va ŭrad i Minsielhascharč Biełarusi, a taksama ŭ JEEK z prapanovaj ab sumiesnym fitasanitarnym kantroli źniešniaj miažy Mytnaha sajuza dla ŭliku pradukcyi, što pastupaje ŭ Biełaruś, havorycca ŭ paviedamleńni Raśsielhasnahladu.
Rasija z 7 žniŭnia na hod abmiežavała impart niekatorych tavaraŭ z krain, jakija ŭviali suprać jaje sankcyi — ZŠA, dziaržaŭ ES, Kanady, Aŭstralii i Narviehii. U «sankcyjny śpis» uvajšli jałavičyna, śvinina, ryba, sadavina, harodnina, ptuška, syry i małočnaja pradukcyja, arechi i inšyja pradukty.
U paviedamleńni Raśsielhasnahladu adznačajecca, što z 11 žniŭnia pa 24 vieraśnia hetaha hoda takaja pradukcyja vyjaŭlena ŭ 88 vypadkach pry sprobach jaje ŭvozu ŭ Rasiju z terytoryi Biełarusi.
«U suviazi z hetym Raśsielhasnahlad źviarnuŭsia va ŭrad Biełarusi, biełaruskaje Ministerstva sielskaj haspadarki i charčavańnia i ŭ Jeŭrazijskuju ekanamičnuju kamisiju (JEEK) z prapanovaj ab arhanizacyi sumiesnaha karancinnaha fitasanitarnaha kantrolu śpiecyjalistami Raśsielhasnahladu i JEEK na źniešniaj miažy Mytnaha sajuza dla ŭliku pradukcyi, što pastupaje na terytoryju Biełarusi», — havorycca ŭ paviedamleńni rasijskaha viedamstva.
Nahadajem, u minułyja vychadnyja Raśsielhasnahlad zajaviŭ, što płodaaharodninnaja pradukcyja z krain ES, u dačynieńni da jakich Rasija ŭviała embarha, «prasočvajecca» na rasijski rynak praź Biełaruś.
«Kantrol pradukcyi ažyćciaŭlajecca ŭ ramkach pravierak rynkaŭ, aharodninnych baz, miescaŭ roźničnaj realizacyi, a taksama na śpiecyjalna arhanizavanych Raśsielhasnahladam fitasanitarnych kantrolnych pastach na administracyjnaj miažy pamiž Rasijaj i Biełaruśsiu», — havaryłasia ŭ paviedamleńni rasijskaha viedamstva.
«Na kantrolnych pastach paśla ŭviadzieńnia Rasijaj śpiecyjalnych ekanamičnych mier Raśsielhasnahladam praduchilena bolš za 80 sprob niezakonnaha ŭvozu raślinnaj pradukcyi krain Jeŭrasajuza z terytoryi Biełarusi. Takuju pradukcyju najbolš časta sprabujuć pravieźci abiaźličana, bieź fitasanitarnaj dakumientacyi, adnak ekśpiertyza ŭpakoŭki časta dazvalaje ŭstanavić jaje pachodžańnie. Zatrymlivajecca i naohuł abiaźličanaja pradukcyja, jakaja prybyvaje i biez dakumientaŭ, i ŭ tary bieź jakoj-niebudź markiroŭki. Vyjaŭlajucca i vypadki, kali pradukcyja trecich krain supravadžajecca fitasanitarnymi siertyfikatami, vydadzienymi słužbaj karancinu i abarony raślin Biełarusi, jakija śviedčać jaje nibyta biełaruskaje pachodžańnie», — adznačaje Raśsielhasnahlad.
Razam z tym Fiederalnaja mytnaja słužba Rasii paśla mier u adkaz na sankcyi Zachadu pakul nie naziraje vialikaj kolkaści vypadkaŭ reekspartu ŭ RF zabaronienaj jeŭrapiejskaj sielhaspradukcyi ź Biełarusi i Kazachstana, zajaviŭ žurnalistam 23 vieraśnia kiraŭnik FTS Andrej Bieljaninaŭ.
«Pakul heta adzinkavyja vypadki. Najbolšj charakternyja parušeńni, heta kali łžetranzit», — skazaŭ kiraŭnik FMS Rasii.
