28 vieraśnia ŭ Minsk z Barysava ŭ druhoj pałovie dnia budzie dastaŭleny kaŭčeh z čaścinkaj moščaŭ śviaciciela Łuki Vojna-Jasianieckaha, archijepiskapa Simfieropalskaha i Krymskaha.
Archijepiskap Łuka — urač-chirurh i vučony z suśvietnym imiem. Za svajo žyćcio (1877—1961) vyratavaŭ vielizarnuju kolkaść bieznadziejnych chvorych. Atrymaŭ dypłom z adznakaj, ale zamiest karjery vučonaha addaŭ pieravahu pasadzie «mužyckaha lekara» — ziemskaha ŭrača. Časam, nie majučy pad rukoj instrumientaŭ, vykarystoŭvaŭ ścizoryk, husinaje piaro, ślasarnyja ščypcy, a zamiest nitak — žanočyja vałasy. Na šmatlikich abrazach, asabliva hrečaskich, śviaciciel Łuka namalavany z chirurhičnymi instrumientami ŭ rukach. Jon vystupiŭ aŭtaram šmatlikich navukovych rabot i 12 tamoŭ propaviedziaŭ.
Dostup viernikaŭ da moščaŭ śviaciciela Łuki budzie arhanizavany štodnia z 8.00 da 22.00 z 29 vieraśnia pa 14 kastryčnika ŭklučna.
Pavodle słoŭ nastajaciela minskaha pravasłaŭnaha prychodu chrama-pomnika ŭ honar Usich Śviatych protaijereja Fiodara Poŭnaha, «heta mierapryjemstva nie prosta mahčymaść pałomnictva da moščaŭ». «Dla nas važna, kab ludzi ŭbačyli i dakranulisia da razumieńnia chresnaha podźvihu i vobraza amal našaha sučaśnika», — zajaviŭ protaijerej žurnalistam.
Pry hetym jon adznačyŭ: «My ŭličyli vopyt raniejšych masavych mierapryjemstvaŭ, kali byŭ kaŭčeh z Darunkami vieščunoŭ i kaŭčeh z čaścinkaj moščaŭ śviatoha apostała Andreja Pieršazvanaha, i pasprabavali minimizavać vierahodnaść praciahłaha stajańnia ludziej u čarzie».
Kaŭčeh z moščami prybyŭ u Biełaruś u ramkach mižnarodnaha prajekta «Dni śviaciciela Łuki». Zvyčajna jon znachodzicca ŭ Śviata-Trajeckim žanočym manastyry Simfieropala.
U suviazi z prybyćciom śviatyni i čakanym napłyvam pałomnikaŭ z 16.00 28 vieraśnia pa 14 kastryčnika terytoryja kala Doma miłasernaści (vuł. Turaŭskaha, a taksama adrezak ad vuł. Skaryny da pr. Niezaležnaści) budzie zakrytaja dla ruchu i parkoŭki transpartnych srodkaŭ, paviedamiła staličnaja DAI.
Dziaržaŭtainśpiekcyja rekamienduje žycharam Minska skarystacca pasłuhami hramadskaha transpartu. Samy zručny varyjant — dabracca da stancyi mietro «Uschod».
Zrabić heta možna jak naziemnym transpartam (aŭtobusy, tralejbusy, maršrutnyja taksi), tak i na mietro. Kolkaść składu na maršrutach u hetym napramku va ŭkazany pieryjad budzie pavialičana dla vyhady pasažyraŭ. Dla haściej stalicy, jakija prybyli na asabistym transparcie, rekamiendavana vykarystoŭvać stajanku, raźmieščanuju pa vuł. Jaźminavaj u rajonie Nacyjanalnaj biblijateki.
