Alaksandr Łukašenka prapanuje ŭ školnych prahramach udzialać bolš uvahi vyvučeńniu biełaruskaj movy.
Ab hetym kiraŭnik dziaržavy zajaviŭ siońnia na sustrečy z členami Savieta Pałaty pradstaŭnikoŭ Nacyjanalnaha schodu.
Pavodle jaho słoŭ, ciapier vyvučajecca situacyja ŭ śfiery siaredniaj adukacyi, dzie taksama chapaje niedachopaŭ. U jakaści prykładu Alaksandr Łukašenka pryvioŭ školnuju prahramu, u jakoj rasiejskaj i navat anhlijskaj movie advodzicca bolš hadzin, čym biełaruskaj.
«Dobra, na rasiejskaj movie my praktyčna ŭsie razmaŭlajem. Ale na biełaruskaj movie, skažam ščyra, u pobycie, doma my razmaŭlajem mienš. Dyk, moža, treba ŭ škole na karyść biełaruskaj movy dać adnu hadzinu, a nie anhlijskaj?» — adznačyŭ kiraŭnik dziaržavy.
Narakańni ŭ Łukašenki jość i da školnaj prahramy pa litaratury, u jakuju pa niezrazumiełych pryčynach uklučajucca tyja ci inšyja tvory.
«Niaŭžo my nie možam tut navieści paradak?! Aburalnaja rabota Ministerstva adukacyi! Vielmi mnoha jość narakańniaŭ», — padkreśliŭ jon.
Łukašenka pry hetym adznačyŭ, što razmova nie idzie pra nieabchodnaść karennaj łomki ŭ śfiery adukacyi, a tolki pra naviadzieńnie paradku i ŭdaskanaleńni pa tych ci inšych napramkach. «Pastaŭlena pytańnie ab aptymizacyi ŭ adukacyi. U nas stolki lišniaha, i absalutna nichto nie ličyć hrošy», — skazaŭ jon.
