Jeŭrapiejski bank rekanstrukcyi i raźvićcia (JEBRR) i Fishman Group (Izrail) abjadnali namahańni dla stvareńnia ŭ Minsku novaha ofisnaha centra, jaki byŭ aficyjna adkryty dla arandataraŭ 29 vieraśnia. Kredyt na 8,7 młn. jeŭra, vydadzieny JEBRR, dapamoh Fishman Group uźvieści ofisny budynak ahulnaj płoščaj 15 tysiač kvadratnych mietraŭ.
Jak paviedamili ŭ pres-słužbie JEBRR, ofisny kompleks raźmieščany ŭ Parku vysokich technałohij.
Dyrektar departamienta pa nieruchomaści i turyźmie JEBRR Kłaudzija Piendred zaznačyła: «Heta pieršy prajekt, jaki finansuje JEBRR u śfiery nieruchomaści ŭ Biełarusi, i my rady padtrymać našaha klijenta, Fishman Group, u raźvićci maładoha IT-siektara ŭ krainie, jaki chutka raźvivajecca».
Josief Frydman, hienieralny dyrektar Svitland Development Ltd. (padrazdialeńnie Fishman Group u Biełarusi i Litvie), padkreśliŭ: «Ja vielmi rady, što naša kampanija raspracavała kancepcyju takoha vysakajakasnaha sučasnaha biźnies-centra ŭ Minsku. Kompleks «Klevier Park» nie tolki prapanoŭvaje kamfortnyja ŭmovy pracy dla biełaruskich vysokatechnałahičnych kampanij, ale i adpaviadaje samym vysokim patrabavańniam enierhaźbieražeńnia. Chočacca zaznačyć, što było b ciažka ažyćciavić hety prajekt biez takoha nadziejnaha partniora, jak JEBRR».
Novy ofisny centr spažyvaje amal na 50% mienš enierhii, čym siaredni ofisny budynak u Biełarusi. Ekanomija enierharesursaŭ u miežach hetaha prajekta moža skłaści 1,35 MVt/hadz u hod, abo 85.500 jeŭra ŭ hrašovym ekvivalencie. Dziakujučy novym ekałahičnym rašeńniam kompleks taksama zmoža minimizavać vykidy CO2.
JEBRR źjaŭlajecca bujnym inviestaram u Biełaruś. Bank vydzieliŭ bolš za 1,5 miljarda jeŭra ŭ miežach 66 prajektaŭ pa stanie na 1 vieraśnia 2014 hoda.
