Spačatku hrupa niamieckich vajskovych instruktaraŭ nie zmahła vylacieć z Bałharyi z-za taho, što ich samalot złamaŭsia. Niemcy dalacieli na hałandskim samalocie. Potym akazałasia, što zbroja, karystacca jakoj jany musili navučyć kurdskich sałdat, što vajujuć ź isłamistami, znachodzicca ŭ drennym stanie i nie zaŭsiody moža być vykarystanaja.
Vajskova-transpartny samalot S-160.
Hetyja incydenty, jak piša Associated Press, demanstrujuć, nakolki mocna vajskovaja moc lidara Jeŭrasajuza adstaje ad jahonaj ekanamičnaj mahutnaści.
Niamieckija ŚMI, spasyłajučysia na kanfidencyjalny dakumient, pieradadzieny deputatam Bundestaha na minułym tydni, pišuć pra vialikija prablemy z vajskovaj technikaj, jakaja majecca na ŭzbrajeńni 182-tysiačnaha Bundeśviera.
Zhodna z hetaj infarmacyjaj, tolki 24 z 43 transpartnych samalotaŭ S-160, tolki 42 z 109 źniščalnikaŭ Eurofighter i 38 z 89 źniščalnikaŭ Tornado, jakija majucca ŭ Luftvafe, znachodziacca ŭ pracazdolnym stanie.
Ministerstva abarony krainy admoviłasia ad taho, kab padćvierdzić ci abvierhnuć hetyja dadzienyja.
Były načalnik hienštaba Hiermanii Charald Kujat adznačyŭ, što častkova drenny stan niamieckaj armii vyklikany chraničnaj niastačaj hrošaj. Kab zbałansavać biudžet, urad u hetym hodzie skaraciŭ vydatki na ŭzbrojenyja siły prykładna na 800 młn jeŭra da 32,44 młrd. Hety abjom, jak i ŭ bolšaści krainaŭ Jeŭrasajuza, značna mieńšy, čym rekamiendavanyja Arhanizacyjaj Paŭnočna-Atłantyčnaj Damovy 2% ŭnutranaha vałavaha praduktu.
Vučeńnie niamieckaj piachoty.
Takim čynam, u pieraliku na 1 sałdata i aficera ź biudžetu Hiermanii ŭ hod u siarednim vydatkoŭvajecca amal 180.000 jeŭra — heta hrošy na ŭsie vidy bajavoha, techničnaha, materyjalnaha i sacyjalnaha zabiaśpiačeńnia.
U Biełarusi ŭ 2014 hodzie anałahičny pakazčyk vydatkaŭ na 1 sałdata składaje kala 8.000 jeŭra.
