Biełaruskija ŭłady admovili ŭ rehistracyi hramadskaha abjadnańnia «Krajovaje zhurtavańnie litvinaŭ».
«Śpis zasnavalnikaŭ HA «Krajovaje zhurtavańnie litvinaŭ» źmiaščaje ŭ sabie niapoŭnyja i niedakładnyja źviestki ab zasnavalnikach dadzienaha hramadskaha abjadnańnia, u suviazi z čym źjaŭlajecca niesapraŭdnym dakumientam», — havorycca ŭ adkazie ź Ministerstva justycyi.
U jakaści niapoŭnych i niedakładnych źviestak pryvodzicca adsutnaść numaroŭ chatnich i pracoŭnych telefonaŭ u dvuch zasnavalnikaŭ, niedakładnyja źviestki ab miescy pražyvańnia ŭ troch zasnavalnikaŭ.
Pry hetym prykładam niedakładnych źviestak pryvodzicca toje, što adras adnaho zasnavalnika padadzieny nastupnym čynam: «h. Słaŭharad, vuł. K. Marksa», tady jak, zajaŭlajuć u Miniuście, jon pavinien vyhladać tak: «h. Słaŭharad, vuł. Marksa Karła Frydrychaviča». I heta pry tym, što baćku Karła Marksa zvali Hienrycham.
«U luboj jeŭrapiejskim dziaržavie heta było b pryznana techničnaj pamyłkaj i dadzieny čas na vypraŭleńnie. Ale my, viadoma, znachodzimsia ŭ vizantyjskaj cyvilizacyi, dzie ŭsio, što niebiaśpiečnaje, zdajecca čužym i varožym», — zajaviŭ staršynia «Krajovaha zhurtavańnia litvinaŭ» Alaksandr Stralcoŭ.
Pavodle jaho słoŭ, ciapier rychtujecca skarha ŭ Viarchoŭny sud.
***
4 žniŭnia ŭ Minsku adbyŭsia ŭstanoŭčy źjezd hramadskaha abjadnańnia «Krajovaje zhurtavańnie litvinaŭ». Na źjeździe prysutničała 50 čałaviek. 5 žniŭnia rehistracyjnyja dakumienty byli padadzienyja ŭ Ministerstva justycyi Biełarusi.
