Siabra HA «Biełaruskaja asacyjacyja žurnalistaŭ» z Hrodna Andrej Mialeška atrymaŭ adpaviednyja dakumienty z suda Hrodzienskaj vobłaści.

U liście za podpisam staršyni suda paviedamlajecca, što sprava suprać Andreja Mialeški pa artykule 22.9 č.2 Administracyjnaha kodeksa (parušeńnie paradku vyrabu i raspaŭsiudu pradukcyi ŚMI) nakiroŭvajecca dla razhladu ŭ sud Hrodzienskaha rajonu.

Aproč hetaha ŭ paniadziełak apoŭdni žurnalist taksama atrymaŭ pozvu z patrabavańniem źjavicca na sudovy razhlad administracyjnaj spravy 2 kastryčnika a 9:30.

Sam Andrej Mialeška nie moža navat ŭjavić, za jakoje parušeńnie jaho chočuć pryciahnuć da adkaznaści, bo pratakoł administracyjnaha pravaparušeńnia składaŭsia nie ŭ jahonaj prysutnaści.

Nahadajem, što sioleta heta ŭžo dziaviataja sproba pryciahnieńnia žurnalistaŭ da adkaznaści za pracu biez akredytacyi na zamiežnyja ŚMI. Ciaham hoda padobnyja spravy ŭžo raspačynalisia suprać siabraŭ HA «Biełaruskaja asacyjacyja žurnalistaŭ» Alesia Dzianisava (štraf), Alesia Zaleŭskaha (štraf), Alaksandra Burakova (adna sprava – za siužet na «Biełsacie», vynik nieviadomy, druhaja – za materyjały na sajcie DW.de, budzie vyrašacca 30 vieraśnia), Michaiła Aršynskaha (za siužet na «Biełsacie», vynik nieviadomy), Vitala Siamaški (zakrytaja), Maryny Maŭčanavaj (štraf) i samoha Andreja Mialeški (štraf).

Šaściora žurnalistaŭ u hetym hodzie atrymlivali papiaredžańni prakuratury za supracoŭnictva z zamiežnymi ŚMI biez akredytacyi.

U toj ža čas mižnarodnyja žurnalisckija arhanizacyi ŭžo daŭno zaklikajuć ułady Biełarusi skasavać anachraničny paradak akredytacyi, jaki parušaje prava na dostup da infarmacyi. Pradstaŭnica ABSIE pa svabodzie ŚMI Dunia Mijatavič padčas svajho aficyjnaha vizitu ŭ Minsk 15-16 vieraśnia 2014 h. taksama akcentavała ŭvahu na nieabchodnaści admianić abaviazkovuju akredytacyju žurnalistaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?