Prysud siońnia byŭ ahučany ŭ sudzie Centralnaha rajona Minska.

Sam praces prachodziŭ u zakrytym režymie i pačaŭsia 15 vieraśnia.

Kanstancin Simanaŭ pryznany vinavatym u «pałavych znosinach nasupierak voli paciarpiełaj z prymianieńniem hvałtu da žančyny — zhvałtavańni zaviedama niepaŭnaletniaj» (pryhavaryć na 6 hadoŭ źniavoleńnia), u dziejańniach seksualnaha charaktaru z asobaj, jakaja dasiahnuła 16-hadovaha ŭzrostu (2,5 hady), u demanstracyi filma parnahrafičnaha charaktaru niepaŭnaletniaj (2 hady), u zahadzia łžyvym paviedamleńni pra vybuch, jaki rychtujecca (4 hady).

Šlacham častkovaha składańnia prysudaŭ Simanava asudzili na 9 hadoŭ kałonii ŭzmocnienaha režymu.

Na karyść HUUS Minharvykankama ź jaho pavinny spahnać 35.467.726 rubloŭ, na karyść KUP «Minsktrans» — 49.947.900, dziaržmyta — 4.070.780.

Siarod rečaŭ, na jakija byŭ nakładzieny aryšt, — dysk «Eratyčnaja kalekcyja». Jon pavinien być źniščany.

Minski mietrapaliten padavaŭ pazoŭ na kampiensacyju Simanavym strataŭ na 232.771.000 rubloŭ — nie atrymany prybytak. Ale hety pazoŭ nie padlahaje razhladu ŭ miežach kryminalnaha pracesu. Budzie asobny sud.

Na sudzie prysutničała dziaŭčyna, jakuju nibyta i zhvałtavaŭ Simanaŭ. Jana siadzieła z maci. I kali ahučyli prysud, jany pasprabavali chutčej vyjści z zały. Simanaŭ pamachaŭ im rukoj, ale adkazu nie było. 

«Faktaŭ hvałtu nie było»,

— zajaviła maci dziaŭčyny, kali da ich źviarnulisia žurnalisty. I admoviłasia ad dalejšych kamientaryjaŭ.

— Padabaronny viny nie pryznaŭ. Ja liču, było dastatkova padstaŭ dla taho, kab nie ŭsio abvinavačańnie lahło ŭ asnovu abvinavaŭčaha prysudu. Liču, što jość padstavy abskardžvańnia,

— zajaviŭ advakat Dźmitryj Haračka. — Abstaviny ja raskazvać i kamientavać nie mahu, bo sudovaje pasiadžeńnie było zakrytym. U hetaj spravie nie ŭsio tak adnaznačna, nie ŭsio tak prosta. I ŭ pieršuju čarhu pa abvinavačańni pa 166, 168 i 340 artykułach.

Raniej paviedamlałasia, što ŭ Simanava jość prablemy ź psichikaj.

«Jość prablemy ź psichičnym zdaroŭjem»,

— paćvierdziŭ Haračka.

***

Jak paviedamlałasia raniej, 34-hadovy žychar Minskaj vobłaści Kanstancin Simanaŭ napisaŭ 26 lutaha SMS, kali jechaŭ u mietrapalitenie, u jakim paviedamiŭ pra najaŭnaść u jaho vybuchovaha prystasavańnia i pra namier jaho ŭzarvać («U mianie bomba ja ŭ mietro dzie ŭzarvać kod aktyvacyi padkažy»). Tady mietro było spyniena, ludzi evakujavanyja, praviaralisia ŭsie stancyi. Simanava nieŭzabavie zatrymali.

Jon abvinavačvaŭsia adrazu pa niekalkich artykułach Kryminalnaha kodeksa. Heta zaviedama niepraŭdzivaje paviedamleńnie pra padrychtoŭku vybuchu, jakoje stvaryła niebiaśpieku dla žyćcia i zdaroŭja ludziej, naniesła straty ŭ bujnym pamiery (jany aceńvajucca ŭ 90 młn rubloŭ); «Zhvałtavańnie», «Sieksualnyja dziejańni ź niepaŭnahadovaj» i «Demanstracyja parnahrafii».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?